प्रदेसम मंत्रिमण्डल विस्तारा छ्वीं ह्वींन तेज
प्रदेसम एकदा दुबरा मंत्रिमण्डल विस्तारा छ्वीं लगणि बैठिग्यीन। मुख्यमंत्री धामिन सतपाल महाराज अर धन सिंह रावतन दगड़ि मुखाभेंट कायी। जैका बाद मंत्रिमण्डल विस्तारा छ्वी हौरि तेज ह्वेग्यीन।
मदन कौशिकन बि मुख्यमंत्री दगड़ि मुखाभेंट कायी। यांका बाद मदन कौशिक कु मंत्री मण्डल म सामिल हूंण तय मन्यें जाणु च।
वखि ऐ बारम भाजपा प्रदेस अध्यक्ष महेन्द्र भट्टन बोलि कि मंत्रिमण्डल कु विस्तार जल्दी होलु। उन्न बतै कि मुख्यमंत्री दिल्ली मा हाईकमान दगड़ि मुखाभेंटा बाद फैसला होलु।
बतै दियां की अबि मंत्रि मण्डल मा पांच सीट खाली छन। जैमा हरद्वार, नैनीताल, बागेश्सर, रुप्रप्रयाग, उत्तरकाशी, पिथौरागढ़ बिटि मंत्री मण्डल मा क्वीं नीं च।
मुख्यमंत्री धामी चंपावत, गणेश जोशी देरादूण, सतपाल महाराज अर धन सिंह रावत पौड़ी, सुबोध उनियाल टिरी गढ़वाल, सौरभ बहुगुणा यूएसनगर, त रेखा आर्य अल्मोड़ा जिला बिटि मंत्री छन त वखि प्रदेस अध्यक्ष महेंद्र भट्ट चमोली जिला बिटि छन।
इन्न मा जौ की छ्वीं सबसे जादा हूंणि च वु मा खजानदास, मदन कौशिक, प्रदीप बत्रा, वंशीधर भगत, विशन सिंह चुफाल, अरविंद पांडेय, विनोद कण्डारी, अर आशा नौटियाल दौड़ मा छन। इन्न मा कैका भाग खुल्दन यु मंत्री मण्डल विस्तार बाद हि पता चललु।