चार दिन कु सत्र द्वी दिनम हि खतम

उत्तराखण्डा रूड़ियों की राजधानी गैरसैंण 19 अगस्त बिटि सुरु ह्वे विधानसभा कु मानसून सत्र आज दूसर दिन खतम ह्वेग्ये।

मॉनसून सत्र कु दुसर दिन आज विधानसभा म खुब घपरोळ ह्वे। विपक्ष अपणि मांग तैं मनौंणा पर अड़यूं रायी।
त सरकारन 9 विधेयक अर 5,315.89 करोड़ कु अनुपूरक बजट पास करै दे।

पैलि दिन सदना कारवै खतम हूंणा बाद विपक्षा सबि विधायकु न सर्या राति विधानसभा म धरना द्यायी। सरकार लाख मनौंण बाद विपक्ष नी मानी। विपक्षा मांग छायीं कि जिला धिकारी नैनीताळ बदलि, एसएसपी तैं नौकरी बिटि भैर, कांग्रेस नेता लग्यां सबि मुकादमा वापिस लिये ज्यां।

विधानसभा गैरसैंण मा चार दिन कु सत्र द्वी दिनमा हि खुब घपरोल बीच ह्वे खतम ह्वेग्ये। द्वी दिना ऐ सत्रम प्रश्नकालम सवाल कु जवाब त दूर, कानून बन्दुबस्त पर सरकार चर्चा करणा खुणि त्यार बि नी ह्वे।

विपक्षा विधानसभा अध्यक्ष तैं काम रोकिक नियम 310 पर कानून बन्दुबस्त क मुद्दा पर सदनम चर्चा करणा मांग करणि छायीं। जैतैं विधानसभा अध्यक्ष ऋतु खंडूडी न ना बोलि दे। विपक्ष मांग छायीं कि पंचैत चुनौ मा जु ह्वे अर प्रदेसम खळाखळ बढ़णा अपराधु पर चर्चा करणा मांग कायी।

नराज कांग्रेसा विधायक सर्या राति सदन मा धरना द्यायी।

इन्न मा जब सदन नी चलि त सरकारन अनुपूरक बजटा दगड़ि नौ विधेयक बिना चर्चाक् पास कै दींन।