मानसून सत्र ‘ 19 अगस्त बिटि 22 अगस्त तक गैरसैंणम होलु
उत्तराखण्ड मानसून सत्र 19 अगस्त बिटि 22 अगसत तक प्रदेसा रूड़ि की राजधानी गैरसैंण म उर्यें जालु। मानसून सत्रा सबि तय्यरि सरकार अर विधानसभ सचिवालय न तेज कै याली।
सत्र कख होलु यांका बारम सरकार अर विधानसभा सचिवालय अकबक हूयां छायीं पर अब साफ ह्वेग्ये की मानसून सत्र गैरसैंण मा हि होलु।
ये मानसून सत्रम संसदीय कार्य मंत्री कु जिम्मा सुबोध उनियाल कांधौं मा च। मुख्यमंत्रिन या जिम्मेबरि सुबोध उनियाल कांधौं म द्यायी।
विधानसभा अध्यक्ष ऋतु खंडूड़ी मानसून सत्र तैं लेकैकि विभागु का अप्सरु दगड़ि एक बैठक कायी।
विधानसभा अध्यक्ष ऋतु खंडूड़ी न बोलि कि हम रूड़ी क राजधानी गैरसैंणम हूंण वलु मानसून सत्र वास्ता सबि तय्यरि पूरि कै यालिन। सत्र वास्ता अबि तक 32 विधायकु का 547 सवाल हमतैं मिलिन।
त वखि मुख्यमंत्री धामिन बतै कि मानसून सत्रा वास्ता हमरि सबि तय्यरि पूरि छन। उन्न बोलि यु हमरु पैलि बिटि फैसला छायीं कि मानूसन सत्र भराड़ी सैंण मा हि होलु।