मुख्यमंत्री धामिन केदारपुरम मा योगा पार्क अर हौरि विकासा कामु कु लोकार्पण अर शिलान्यास कायी

मुख्यमंत्री धामिन आज केदारपुरम देरादूण मा बण्यूं योगा पार्क अर हौरि विकासा कामु कु लोकार्पण अर शिलान्यास कायी।
ऐ मौका फर मुख्यमंत्रिन बोलि कि केदारपुरम म योगा पार्का जरिया हम राजधानी देरादूणम स्वास्थ्य पर्यावरणा दगड़ि चलणा वास्ता अगनै बणणा छौ।

मुख्यमंत्रिन बोलि कि योगा पार्क सर्या देरादूण वास्ता आकर्षण कु केन्द्र हि ना बल स्वास्थ्य अर सामाजिक गतिविधियों की जगा बि बणलु।

मुख्यमंत्रिन बोलि प्रदेस सरकार उत्तराखण्उ तैं योग अर अध्यात्म की राजधानी बणौंण वास्ता काम करणि च। इल्लै ऐसु हमन अंतर्राष्ट्रीय योग दिवसा मौका फर प्रदेसम देसा पैलि ‘योग नीति’ लागू कर्ये ग्यायी। यांका दगड़ि आयुर्वेदिक अर प्राकृतिक चिकित्सा, योग अर आध्यात्मिक पर्यटन तैं अगनै बढ़ावा देंणा वास्ता गढ़वाल अर कुमौ मा एक-एक ‘स्पिरिचुअल इकोनॉमिक जोन’ बणौंण तय्यरि करे जाणि च।

ऐ मौका पर मुख्यमंत्रिन एआई चैटबॉट ‘निगम सारथी’ लॉच कायी अर हरित नीति कु डोक्यूमेंट कु अनावरण बि कायी।

इस दौरान मुख्यमंत्रिन गांधी पार्का विकास अर सौंदर्यीकरण कामु का वास्ता रुपया 164.33 लाख अर नगर निगम टाउन हॉल तैं टमणा अर नगर निगमा बिल्डिंगा भैर एफआरपी काम करणा वास्ता रुपया 232.50 लाख कु शिलान्यास कायी। मुख्यमंत्रिन वार्ड 33 यमुना कॉलोनी पार्का वास्ता रुपया 139.49 लाख, वार्ड 88 हरबाजवाला माछा कु तलौ क् देखरेख वास्ता, वनीकरण अर वाकिंग ट्रेक बणौंणा वास्ता रुपया 170.32 लाख अर वार्ड 58 डिफेंस कॉलोनी केदारपुरमा योगा पार्क बणौंणु अर हौरि विकासा काम वास्ता रुप्या 437.07 लाख कु लोकार्पण कायी।

ऐ मौका फर राज्यसभा सांसद डॉ. कल्पना सैनी, मेयर देरादूण सौरभ थपलियाल, विधायक उमेश शर्मा काऊ, श्रीमती सविता कपूर, सचिव श्रीधर बाबू अदांकी, नगर आयुक्त देरादूण नमामि बंसल,अर हौरि अप्सर छायीं।