मनसा देवी हादसा, अफवा से जादा, त घोर लापरवै च

सौंणा मैना मंदिरम आशीर्वाद लिंणा खुणि ग्यया लोखुक सांस एक अफवान टूटिग्ये। मनसा देवी मंदिरम हूयीं छतराड़ी (भगदड़) की घटनम 6 लोग टूंणपट ह्वेग्येन। 27 जुलै सुबेर बौत बड़ी संख्यम लोग हैंसदा-ख्यलदा माँ मनसा देवी क दर्शन करणा खूणि जाणा छायीं, त कुछ लोग दर्शन कैकि फरकणा छायीं। बाटा मा खुब भिवड़ाट छायीं। तबि कैन या अफवा फैलै दे की रैंलिग मा करंट आणु च। बस मनसा देवी मंदिरा बाटा मा छतराड़ी मचिग्ये, जु भ्वां लमडि वु दूबरा उठि नीं साकी। जै कारण 6 लोखु की जान चलिग्ये अर 29 लोग घैल ह्वेग्यीन। ये भिवड़ाट न कतगै परिवारु तैं जिन्दगि भर कु जखम दे ग्यायी। उन्न त हरिद्वारम या पैलि घटना नी च। यां से पैलि बि हरद्वारम इन्न कतगै घटना ह्वे। साल 1912 म हरद्वार कुम्भ म्यळा भगदड़ ह्वे 7 लोग त, साल 1966 म बि कुंभ म्यळा की भगदड़म 12 लोगु की जान चलिग्ये छायीं। साल उन्नीस सौ छियासिम 52 लोगु कि मौत ह्वे। वखि साल 1996सा कुम्भ मा 22 लोग म्वोरि ग्यीं, त साल 2010सम 7 लोख। साल 2011 गायत्री कुंभम भगदड़ हूंण बाद 20 लोगु की मौत ह्वेग्यायी। अर अब 26 जुलै 2025 मनसादेवी मंदिर मा छतराड़ी ह्वे त 6 लोग म्वोरि त 29 लोग घैल ह्वेग्येन। यां से पैलि अबि पुरी मा रथ जातरा म भगदड़ मा तीन भक्त टुणपट ह्वेग्यींन।

सौंण कु मैना अर छुट्टी कु दिन इन्न मा हरद्वार म कुछ जादा बि श्रद्धालु हरद्वार पौंछिग्येन। यीं कारण छायीं कि मनसा देवी मा बि कुछ जादा हि लोग पौंछिग्यीन। इन्न मा पुलिस प्रशासन अर मंदिर समिति न लोगु तैं बस मा करणा वास्ता बन्दुबस्त किलै नी कायी। मंदिर प्रशासन ब्वनु च कि घटना मंदिर मा नीं ह्वे, बल या घटना मंदिर से पैलि ह्वे। इन्लै सवाल खड़ा हूंणा छन कि घटना मंदिरम ह्वायी या घटना मंदिर से पैलि ह्वे, मंदिर समिति अपणि जिमेबरि से बचि नी सकदि। भीड़ जादा छायीं त पुलिसन आण-जाण खुणि अलग-अलग वाटौं कु बन्दुबस्त किलै नीं कायीं।

अब सवाल त यु बि खडु हूंण च कि आखिर इन्न घटना बार-बार किलै हूंदन ? हरद्वारम बार बार इन्न घटना हूंण छन पर यांका बाद बि हमन कुछ नीं सीखि। त यांकु जवाब च कि पिछल कुछ सालु बिटि भीड़ हमरि सफलता कु पैमाना ह्वेग्ये। भीड़ जगता जादा होलि, वै कारिज तैं उगता सफल मने जालु। अब त बिटि भीड़ तंत्र धार्मिक पछ्याण ह्वेग्य, मंदिरु मा जतगा जादा भीड़, जगता जादा दान-दक्झणा जमा होली, भगवान बि उतगै बड़ा होला। अर यु इल्लै ह्वे कि धर्म अब कारौबार ह्वेग्येे जतगा जादा लोग दर्शन खुणि आला उतगै जादा चढ़ावा मंदिरम चढ़ाला।

अब यीं घटना एकदा दुबरा देसम भीड़ प्रंबधन त्यारियों पर सवाल खड़ा कै याली। यख सवाल जिला प्रशासन अर सरकार पर बि छन, मंदिरु मा जादा से जादा लोगु तैं जमा करण वास्ता सरकार खुब प्रचार-प्रसार करद पर भीड़ तैं सम्भलणम लापरवै किलै? जिला प्रशासन अच्छु बन्दुबस्त करणा खुणि खुब बखान करदु पर जब क्वीं घटना ह्वे जांद, त पता चलदु की सबि बन्दुबस्त सिरफ कागजु मा हि छायीं।

इन्न मा अब वक्त ऐग्ये जब हमतैं स्वचण प्वाडलु कि भगवान सिरफ मंदिरु मा हि जैकि ना, बल भगवान दर्शन त अपणा भितर बि करे जै सकदन। मनसा देवी हादसा सिरफ अफवा कु नतीजा नी च या घटना लोगु सुरक्षा बन्दुबस्त मा घोर लापरवै की मिसाल बि च।