सरकार, हाउस ऑफ हिमालयाज जरिया धर्या उत्पादु तैं सर्या दुन्या म पछ्याण दिलौंणा कु काम करणि चः CM
प्रदसे सरकार एक जनपद, द्वी उत्पाद योजना क जरिया वखक लोगुकि आजीविका तैं बढ़ौंणा वास्ता हाउस ऑफ हिमालयाज ब्रांड का जरिया धर्यां उत्पादु तैं सर्या दुन्या म पछ्याण दिलौंणा कु काम करणि च। या बात मुख्यमंत्रिन धामिन देरादूणा डांडा नूरीवालम उर्यूं कार्यक्रम म बोलि।
मुख्यमंत्री धामिन ग्रामीण विकास विभागा एकीकृत भवन कु शिलान्यास पर बधै द्यायी अर बोलि कि 58.32 करोड़ रुप्यौं से बणण वलु ग्राम्य विकास भवन क्षेत्रा विकास वास्ता बौत महत्वपूर्ण साबित होलु। मुख्यमंत्रिन बोलि कि दुन्या का बड़ा-बड़ा देसुमा प्रदेसा बण्यां उत्पादु तैं भ्यजण की योजना पर काम करे जाणु च। उन्न बोलि साल 2017 तक सरकार कु लक्ष्य 25 करोड़ रुप्यौं कु कारोबार करणा कु च। जै से प्रदेसा ज्वानु, ब्यटुला अर स्वयं स्हायता समूहों तैं आजीविका से ज्वणे जालु। मुख्यमंत्री न बोलि कि स्टेट मिलेट मिशन, फार्म मशीनरी बैंक, एप्पल मिशन, नई पर्यटन नीति नै फिल्म नीति, होम स्टे, वेड इन उत्तराखण्ड अर सौर स्वरुजगार जनि योजना प्रदेसा अर्थ व्यवस्था तैं मजबूत करणि छन। होम स्टे योजना जरिया प्रदेस दूर गौं मा अपणि अलग पछ्याण बणौंणा छन। लखपति दीदी योजना प्रदेसा ब्यटुळों तैं आर्थिक मजबूत बणौंणि च। मुख्यमंत्रिन बोलि कि प्रदेस तैं योग राजधानी बणौंणा वास्ता योग नीति सुरु कै याली। केन्द्रीय पर्यटन मंत्रालय क तरफां बिटि प्रदेसा चार गौं जखोल, हर्षिल, गंूजी अर सूपी तैं सबसे अच्छु पर्यटन गौं कु इनाम मिलि।
मुख्यमंत्रिन बोलि कि उन्न गैरसैंणा सारकोट गौं तैं आर्दश गौं बणौंणा वास्ता खुचिल (गोद) ले छायीं। जै मा प्रदेस सरकार सफल रायीं। सारकोट मा लोग, गौड़ि-भैंस पलणा कु, मशरूम, होम स्टे, म्वाटु नाज क खेती करणा छन अर अगनै बढ़णा छन। उन्न बोलि पंचैत चुनौ मा प्रदेसा सबसे कम उमरा प्रधान सारकोटा 21 सालै प्रियंका नेगी बणि। मुख्यमंत्रिन प्रियंका नेगी तैं बधै द्यायी अर बोलि कि प्रियंका तैं देरादूण औंणा कु न्यूतो दिये जालु अर सारकोटा गौं का विकास वास्ता चर्चा करे जाली।
ऐ मौका फर विधायक उमेश शर्मा, सचिव श्रीमती राधिका झा, अपर सचिव अभिषेक रोहेला, श्रीमती अनुराधा पाल, सुश्री झरना कमठान अर अधिकारी बि छायीं।