मुख्यमंत्री धामिन अतुल दगडि दूरभाष पर कायी बात, मदत कु भरोसु द्यायी

सर्या उत्तराखण्ड अतुल तैं बधै देंणु च। मुख्यमंत्री धामिन बि आज अतुल दगडि दूरभाष पर बात कायी अर अतुल तैं बधै द्यायी। मुख्यमंत्रिन बोलि कि अतुल न अपणि मेनत से हौरि लोगु तैं बि प्रेरित कायी। मुख्यमंत्रिन बोलि कठिण हलातु बाद क्वीं खुब मेनत करदु त वैंका स्वींणा जरुर पूरा हूंदन। मुख्यमंत्रिन अतुल तैं हरेक तरौं मदत कु भरोसु दे।

बतै दियां कि रुप्रयाग जिला कु एक छ्वटु गौं बीरों-देवल कु अतुल न केदारनाथ मा घ्वड़ा चलिकि अपणि पढै़ कु खरचा निकालि।
घौर हलात ठीक नीं हूंणा कारण अतुलन केदारनाथ जातरा म ध्वड़ा चलौंणा कु फैसला कायी अर श्रीनगर गढ़वाल बिटि बीएससी कायी। अतुल कक्षा आठ बिटि केदारनाथ जातरा मा घ्वड़ा चलैकि कुटुम्दरि अर अपणि पढ़ै कु खरचा उठौंणा छायीं। यीं कठिण मेनत बल पर अतुल कु चयन आईआईटी मद्रास म ह्वे।