लोक त्योवार हरेला पर मुख्यमंत्रिन रुद्राक्ष कु डाळु बि लगै

गोरखा मिलिट्री इंटर कॉलेजम देरादूणम उत्तराखण्ड कु लोक त्योवार “हरेला” कु त्योवार मन्ये ग्यायी। मुख्यमंत्रिन ‘धरती माँ का ऋण चुकाओ’ थीम पर उर्यूं डाळा लगावा कार्यक्रम मा भाग ल्यायी। ऐ मौका पर मुख्यमंत्रिन धामिन रुद्राक्ष कु डाळु बि लगै।

मुख्यमंत्रिन बोलि हरेला सिरफ एक त्योवार हि नीं च बल हरेला उत्तराखण्डा संस्कृति प्रकृति अर चेतना से जुड़यूं भाव च, जु पर्यावरण तैं बचौंणा वास्ता हमतैं हमरि जिम्मेबरि की याद दिलौंदु। उन्न बोलि हरेला त्योवार फर प्रदेसम 5 लाख डाळा लगौंण कु लक्ष्य च।

मुख्यमंत्रिन बोलि कि वन विभागन प्रत्येक डिवीजन मा 50 प्रतिशत फळु का डाळा लगौंणा लक्ष्य धर्यूं च। उन्न बोलि ये महा अभियानम स्वयंसेवी संगठनु, इस्कुळयां नौन्याळु ब्यटुळा समूह अर पंचैतु की मदत लिये जाणि च। उन्न बोलि कि डाळ लगौंण हि ना बल ऊतैं बचौंणा वास्ता ऊंकी रखवळि बि करे ज्यां , उन्न बोलि डाळों की रक्षा करणु हम सब्यौं कु नैतिक कर्तव्य बि च।

मुख्यमंत्रिन प्रदेसा रैवासियों से विनति कायी कि अपड़ा जिन्दगिम एक डाळु जरुर लग्यां अर वैंकी रखवळि कर्या।

ऐ मौका फर विधायक कैबिनेट मंत्री सुबोध उनियाल, गणेश जोशी, विधायक श्रीमती सविता कपूर, खजान दास, देहरादूणा मेयर सौरभ थपलियाल, मुख्य सचिव आनंद बर्द्धन, प्रमुख सचिव आर.के. सुधांशु, पुलिस महानिदेशक दीपम सेठ, प्रमुख वन संरक्षक समीर सिन्हा अर वन विभागा अधिकारी बि छायीं।