राजस्व विभागा अप्सरु फर भू-माफिया दगड़ि मिलिकि वन विभागा जमीन कब्जौंणा कु आरोप

राष्ट्रवादी रीजनल पार्टिका राष्ट्रीय अध्यक्ष शिवप्रसाद सेमवालन वन विभाग अर राजस्व विभागा अप्सरु फर भू-माफिया दगड़ि मिलिकि अधोईवाला देरादूणम वन विभागा 200 बीघा से जादा जमीन कब्जा करणा कु आरोप लगै।

शिवप्रसाद सेमवालन बोलि कि अधोईवाला लाडपुर मा खसरा नम्बर 1075रा 200 बीघा जंगलाता जमीन पर छ्वटा-छ्वटा प्लौट काटिकि भैरा लोगु तैं दिये ग्यींन। जै से क्षेत्रा डेमोग्राफी पूरि तरौं बदलि ह्वेग्ये। उन्न बोलि यांका बाद बि वन विभागन अपिण जमीन सीमांकन कायी अर न हि जमीन कु नक्शा तैं ठीक कायी। यख तककि वन विभागन ऐ जमीन कब्जा बारम अपणा बड़ा अधिकारियों तैं कुछ बि नीं बतै।

उत्तराखण्ड प्रेस क्लब मा प्रेस वार्ता कैकि राष्ट्रवादी रीजनल पार्टी न मुख्यमंत्री धामि से जमीन खाली कैकि कारवै करणा मांग कायी।

वखि यांका बारम राष्ट्रवादी रीजनल पार्टिका वन एवं पर्यावरण प्रकोष्ठा प्रदेस अध्यक्ष योगेश ईष्टवालन बोलि कि एक तरफा मुख्यमंत्री धामि ब्वलद की मि प्रदेसा डेमोग्राफी तैं बदलि नीं हूंण द्यूळू अर दुसर तरफां ऊंका अप्सरु वन विभागा जमीन पर कब्जा करौंणा छन। उन्न बोलि यांका बारम एसडीएम अर डीएम मा कतगै बार सिकैत कायी पर क्वीं कारवै नीं ह्वे। उन्न मांग कायी कि जब तक या सर्या जमीन राजस्व अभिलेखों मा दर्ज नीं ह्वे जाली तब तक यीं जमीना रजिस्ट्री अर दाखिल खारिज नीं करे ज्यां। उन्न बोलि कि अगर ऐ मामला मा शासन अर प्रशासना आंखा नी खिलला त राष्ट्रवादी पार्टी तैं सड़कियों मा अर न्यायालय तक लडै़ लड़ण खुणि त्यार च।