रक्तदान जीवन दान च, हम सब्यौं तैं बगत-बगतम रक्तदान करण चैंद: काउ

‘एक विचार एक नई सोच’ सामाजिक संगठन अर हौरि सत्तरा संस्थाओं कु उर्यूं स्वास्थ्य संवाद व स्वैच्छिक रक्तदान शिविरम समाज सेवा की मिसाल दियें ग्यायी अर 216 यूनिट रक्तदान करे ग्यायी।

ऐ मौका पर मुख्यअतिथि विधायक रायपुर उमेश शर्मा काउ न बोलि कि रक्तदान जीवन दान च, हम सब्यौं तैं बगत-बगतम रक्तदान करण चैंद।

त वखि अति विशिष्ट अतिथि अपर सचिव मुख्यमंत्री, महानिदेशक सूचना अर लोक संपर्क विभाग बंशीधर तिवारिन बोलि कि यु देखिकि कि बौत अच्छु लगणु च कि ज्वान बड़ी संख्या मा रक्तदान करण खुणि अगनै आणा छन। उन्न बोलि कि समाज बणौंणा कु काम सिरफ सरकारी योजनाओं से सम्भौव नीं ह्वे सकदु यांका वास्ता इन्नि स्वयंसेवी कोसिस हि असली अधार बणदन। समाजिक संगठन जन्नि संस्था जब अगनै ऐकी ज्वानु तैं ज्वड़द त समाजम बदलाव की बुनियाद हौरि कटकुटि हूंद। उन्न बोलि रक्तदान करण से कैकि जिन्दगि हि नीं बचदि, बल मनख्यात बि ज्यूंदि रैंद।

निदेशक चिकित्सा शिक्षा डॉ. आशुतोष सयाना न बोलि कि रक्त दान चिकित्सा वास्ता महत्वपूर्ण अधार बणदा जाणु च। हमतैं जादा से जादा लोगु तैं रक्तदान करणा खुणि जागरुक करण चैंद।

ऐ मौका फर स्वास्थ्य अर सामाजिक क्षेत्रम काम करण वला 21 मनखियों तैं सम्मानित बि करे ग्यायी।