मुख्यमंत्री धामिन चौमासा द्वी मैना शासन अर प्रशासना अधिकारियों तैं 24 घण्टा चंख रैंणा निर्देश दींन
मुख्यमंत्री धामिन आज उत्तराखण्ड राज्य आपतकालीन परिचालन केन्द्र आईटी पार्क पौंछिकि प्रदेसम हूंणि बरखा बारम जाणकारी ल्यायी।
मुख्यमंत्रिन चौमासा द्वी मैना शासन अर प्रशासना अधिकारियों तैं 24 घण्टा चंख रैंणा निर्देश दींन। उन्न बोलि चौमास मैना मा सबि अधिकारी तैं दप्तर मा रैकि सबि बन्दुबस्त करणा निर्देश बि दींन।
मुख्यमंत्रिन चारधाम जातरा पर अयां सबि श्रद्धालुओं सुरक्षा कु बन्दुबस्त करणा वास्ता जिलाधिकारियों निर्देश दींन। उन्न जातरियों खुणि खाणु , दवै अर बच्चों का वास्ता दूद, अर हौरि जरुरी बन्दुबस्त करण बारम बोलि।
मुख्यमंत्रिन बोलि प्रदेसम खळाखळ बरखा हूंणि च, जातरियों सुरक्षा पैलि च, इल्लै चारधाम जातरा 24 घण्टा खुणि र्वके ग्यायी।
मुख्यमंत्रिन सबि जिलाधिकारियों तैं निर्देश दीं कि गदनों अर गदेरो क नजीक अर जख आपदा औंणा सम्भौवना च वख रैंण वला लोगु तैं सुरक्षित जगों मा फट्यें ज्यां। अर जख निर्माण काम चलणा छन, वख काम करण वला लोगु कु रैंणा कु बन्दुबस्त सुरक्षित जगा मा करे ज्यां।
मुख्यमंत्रिन ऐ मौका फर सबि जिलाधिकारियों बिटि जनपदु मा हूंणि बरखा , सड़का दसा अर हौरि सुविधौं का बारम जाणकारी बि ल्यायी। मुख्यमंत्रिन बोलि कि जु सड़क बन्द छन वीं सड़क तैं ख्वलणा कु काम बि करे ज्यां।
ऐ मौका फर मुख्य सचिव आनंद बर्द्धन, प्रमुख सचिव आर.के सुधांशु, सचिव शैलेश बगौली, विनोद कुमार सुमन, गढ़वाल कमिश्नर विनय शंकर पाण्डेय, आईजी गढ़वाल राजीव स्वरूप, अपर सचिव बंशीधर तिवारी, अपर मुख्य कार्यकारी अधिकारी आनंद स्वरूप, राजकुमार नेगी अर वर्चुअल माध्यम से सबि जिलों का जिलाधिकारी जुड़यां छायीं।