धूमधाम से निक्कले ग्यायी भगवान जगन्नाथै रथ जातरा
लीची बाग न्यू कैण्ट रोड बिटिन श्री भगवान जगन्नाथै भव्य रथ जातरा निक्कले ग्यायी। शंख, ढोल अर भजनु का बीच रथ जातरा म खुब लोगुन भाग ल्यायी।
चैतन्य महाप्रभू नामहट श्री जगन्नाथ मंदिर नया गांव हाथीबड़कला देरादूण न आज भगवान जगन्नाथ रथ जातरा उर्याईं। रथजातरा मा अगनै-अगनै भक्त हरे कृष्णा, हरे कृष्णा, कृष्णा कृष्णा हरे हरे पर नचणा छायीं त, मृदंग लेकैकि रथजातरा म चलण भक्त नंगि खुटौं नचणा छायीं।
भगवान जगन्नाथ रथ जातरा कु लोगुन जगा-जगा फुळुन स्वागत कायी। मंत्री गणेश जोशीन अपड़ा सरकरि घौर हाथीबड़कलम भगवान जगन्नाथै आरती कायी अर आशीर्वाद ल्यायी।
रथ जातरा म बैंड-बाजा, ढोल दमाऊ, भगवाना झांकी, शिवपार्वती नचणा छायीं त वखि छ्वटि नौनि भगवाना नृत्य नाटिका प्रस्तुत कायी।
चैतन्या महाप्रभू नामहटा भक्त राधा कांत न बतै कि श्री जगन्नाथ मंदिर ट्रस्टा जातरा कु मकसद उत्तराखण्डा रैवासियों तैं भगवान जगन्नाथ कृपा प्राप्त करौंण च। उन्न बोलि कि नामहटा स्थापना चैतन्य महाप्रभू गौड़ीयमठ संस्थापक आचार्य अष्ठोता त्रिंतंडी स्वामी श्री भक्ति प्रसाद विष्णु महाराजन कायी। जु सर्या दुन्यम सनातम धर्म कु प्रचार करणा छन।
नामहट का संचालक हायग्रिव दास जी न भगवान जगन्नाथ जी क रथ जातरा क कथा सूणै अर वांका बाद जगन्नाथ रथ जातरा आरुड ह्वेकैकि सबि तैं दर्शन दींन।
रथ जातरा म देरादूणा मेयर सौरभ थपलियाल, पैल्यक मेयर सुनील उनियाल गामा, धर्मपुर विधायक विनोद चमोली न भगवान जगन्नाथ की आशीर्वाद ल्यायी।