प्रदेसम बढ़दै जाणु च तीर्थाटन

चारधाम जातरा पर ऐसु 32 लाख से जाना जातरी अबि तक ऐग्येन। यामा सबसे अच्छी बात या च कि जातरी चारधामा अलाव हौरि मंदिर अर जगों मा बि जाणा छन।

उत्तराखण्डा चारधामा जातरा पर हरेक साल लाखौं जातरी औंदन। अबि तक चारधाम जातरा अर हेमकुण्ड साहिब जातरा वास्ता 44 लाख से जादा लोग ऐग्येन। यामा यमुनोत्री धाम के खुणि 713456, गंगोत्री खुणि 780554, केदारनाथ खुणि 1443513, बद्रीनाथ खुणि 1336923 अर हेमकुंड खुणि 169180 जातरियों का पंजीकरण हूयां छन। जैमा बिटि अबि तक लगभग 32 लाख लोगुन अपिण जातरा पूरि कै याली।

अर यु बि मुख्यमंत्री धामिन कु तीर्थ-स्थल अर चारधामु का खुब प्रचार-प्रसार कु असर च। तीर्थ जारियों कु औंण से उत्तराखण्ड की आर्थिक हौरि तेजी के अगनै बढ़लि। यांकु असर च अब लोग भगवान कार्तिकेय स्वामी मंदिर, उत्तरकाशी म जगन्नाथ मंदिर दगड़ि हौरि मंदिरु म जातरियों की संख्या खळाखळ बढ़दै जाणि च।

कार्तिक स्वामी मंदिरम पिछल साल चार लाख जातरी पौंछि छायीं, अर ऐसु जून मैना अबि यख दस लाख से जादा जातरी पौंछिग्ये त उत्तरकाशी म जगन्नाथ् मंदिरम ऐसु 25 हजार से जादा जातरी पौंछिन।
यां से चारधाम जातरा बाटौं अर हौरि जगों मा रेस्टोरेंट, होटल, दुकनिम खुब चखळ-पखळ हूंयी च। यां से वख क रैवासियों तैं रुजगार मिलणु च।

मुख्यमंत्री धामी कु ब्वन च कि उत्तरखण्ड कु विकास वास्ता सबि तोकम तीर्थाटन अर पर्यटन खुब हूंण चैंद। उत्तराखण्ड द्य्बतौं की भूमि च, यख हरेक मंदिर खास छन। सरकार बि तीर्थ जगों पर सबि सुविधौं कु विकास करणा कोसिस करणि च।