राज्यपाल अर मुख्यमंत्री धामिन हेमकुंड साहिब जातरम जाण वळु पैलु जत्था तैं ऋषिकेश बटि फट्यायीं

राज्यपाल अर मुख्यमंत्री धामिन आज ऋषिकेश बिटि हेमकुंड साहिब जातरा जाण वळु पैलु जत्था तैं फट्यायीं। राज्यपाल अर मुख्यमंत्री न जातरा पर जाण वळा पैलु जत्था तैं बधै द्यायी।

ऐ मौका फर राज्यपाल न बोलि श्री हेमकुंड साहिब भक्ति, विस्वासा अर आस्था की जातरा च। उन्न बोलि 15 हजार फीट पर अर 18 किलोमीटरा पैदल जातरा श्रद्वालु क धैर्य, सास अर आस्था कु इमत्यान च।

राज्यपालन बोलि कि सरकार हेमकुंड साहिब जातरा तैं असान अर सुरक्षित बणौंणा वास्ता कोसिस करणि च। उन्न प्रशासन अर गुरुद्वारा प्रबंधन समिति क जातरा बाटों पर करी तय्यरि की खुब तरिफ कायी। राज्यपालन जातरियों से विनीति कायी कि जातरमा प्लास्टिक कु इस्तमाल नीं कर्यां अर उत्तराखण्डा घर्या चीजु तैं मूल्यें की ‘वोकल फॅार लोकल’ अभियान तैं अगनै बढ़यां।

ऐ मौका पर मुख्यमंत्रिन बोलि कि श्री हेमकुण्ड साहिब जातरा हमर प्रदेसा धार्मिक आध्यात्मिक, संस्कृति कु प्रयाग च। उन्न बोल हेमकुण्ड साहिब सिख समाज आस्था कु केन्द्र च। उन्न बोलि या देवभूमि आज बि दिव्य ऊर्जा कु केन्द्र च। मुख्यमंत्रिन बोलि कि कठिण बाटों अर खराब मौसम बाद बि हरेक साल श्रद्धालु जातरा म सामिल हूंदन।

मुख्यमंत्रिन बोलि कि औंण वळा दिनुमा जातरा बौत कम बग्त मा पूरि ह्वे जाली। उन्न बोलि प्रदेस सरकार जातरा तैं असान बणौंणा वास्ता गोविन्दघाटम वैली ब्रिज बणौंणि च। उन्न बोलि जातरा बाटों मा जगा-जगम रेलिंग, साइन बोर्ड, मेडिकल कैंप अर गरम पाणि कु बन्दुबस्त बि करे ग्यायी।