वेद ऋचा अर मंत्रोच्चारा बाद खुलिग्यींन द्वितीय केदार का द्वार
रुद्रप्रयाग: पंच केदारु मा द्वितीय केदार भगवान मद्महेश्वरा द्वार आज वेद ऋचाओं व मंत्रोच्चारण दगड़ि खुलिग्येन।
ऐ मौका पर 667 श्रद्धालु मंदिरा द्वार खुलण पर साक्षी बणिन।
21 मई खुणि ब्रह्म बेला पर गौंडार गौं मा मदमहेश्वर धामा प्रधान पुजरि शिवलिंगन पंचांग पूजन कायी अर भगवान महमहेश्वर दगड़ि तैंतीस कोटी देवी-द्यब्तौं कु आह्वान कायी। जैका बाद सुबेर 5 बजिकि भगवान मदमहेश्वरा चल विग्रह उत्सव डोली कु श्रृंगार कैकि आरती करे ग्यायी। यांका बाद भगवान मदमहेश्वरा चल विग्रह उत्सव डोली गौंडार गौं बिटि कैलाश खुणि फैटिग्ये।
सुबेर 11 बजि मदमहेश्वर धाम मा भण्डारी मदन सिंह पंवार अर विशाम्बर पंवार न धाम बटि शंख बजैकि भगवान मदमहेश्वरा डोली तैं धाम मा औंणा कु न्यूता दे। धाम मा पौंछिकि उत्सव डोलिन धाम पौंछिकि तीनदा मंदिरा परिक्रमा कायी।
भगवान मदमहेश्वर द्वार वेद ऋचा अर मंत्रोच्चारा बाद सुबेर ठीक 11 बजिकि 10 मिनट खुलिग्यींन।
मंदिरा द्वार खुलण बाद पंडित कलाधर सेमवाल न शुद्धिकरण यज्ञ कायी। जैका बाद भक्तु न भगवान मदमहेश्वरा स्वयंभू लिंग पर जल चढ़कि सब्यौं तैं सुखी सन्ति रैंया या कामना कायी।