युवा नेतौं पर भरोसु कैकि अगनै बढ़ौंण की एक कोसिस

छत्तीसगढ़म विष्णुदेव साय, मध्यमप्रदेसम मोहन यादव, राजस्थानम भजनलाल शर्मा, हरियाणम नायब सिंह सैनी अर अब दिल्लिम रेखा गुप्ता। पांच प्रदेसुम नै मुख्यमंत्री बणै कि भाजपा हाईकमानन सब्यौं तैं झक कै दे। दिल्लिम त पैलि बार विधायक बणि रेखा गुप्ता तैं दिल्ली कु मुख्यमंत्री बण्यें ग्यायी।

राजनैतिक जणगुरु ये फैसला पिछनै भाजपा की रणनीति बतौंणा छन अर या तैं भाजपा की भवेष्य राजनीति तैं बि जोड़िकि दय्खणा छन। क्वीं सोशल इंजीनियरिंग ब्वलणु च, त क्वीं बड़ा नेतौं तैं पिछनै कै कि नै नेतौं तैं अगनै ल्याणा कोसिस, त क्वीं मोदी अर अमित शाह कु सरप्राइज बतौंणु च।

मगर जरा यां से अलग कैकि स्वचा त, न त या क्वीं सियासी चाल च अर न क्वीं कालाकारी। सचै त या च कि भाजपम अब नै दौरा राजनीति सुरु ह्वेग्ये अर भवेष्य नेता त्यार हूंणा छन। पैलि, दूसरि न बल तिसर अर चौथी पंगतै नेतौं तैं मौका दिये जाणु च।

भाजपन इन फैसला लिंणा सुरुवात साल 2021 मा उत्तराखण्ड बिटि कायी। जख उन्न पिछनै की पंगतम बैठयां धामी तैं अचाणचक प्रदेस कु मुखिया बणै दे। उत्तराखण्ड मा पुष्कर प्रयोग सफल हूंणा बाद भाजपन हौरि प्रदेसुमा बि इन्न कायी।

जरा याद करा! साल 2021 उत्तराखण्ड म तीरथ सिंह रावता इस्तीफा बाद पार्टी न दूसर बारा विधायक पुष्कर सिंह धामी तैं नै मुख्यमंत्री बणैकि सबि राजनीतिक जणगुरुयौं तैं गलत साबित कै दे। उबरि धामी मुख्यमंत्री क पदा वास्ता नै छायीं।

धामी तैं अगनै कैकि भाजपन साल 2022 म चुनौ लैड़ि भाजपा तैं बड़ी जीत मिलि। अर भाजपन उत्तराखण्डम लगातार दुबरा सरकार बणै। पर धामी अपणि सीट खटीमा बिटि चुनौ हारि ग्येन। पार्टीन धामी पर हि भरोसु कायी अर चुनौ मा हरणा बात ऊतैं कि मुख्यमंत्री बणै।
छै मैना कार्यकालम मुख्यमंत्री धामिन कै काम करिन, बड़ी बात या कि धामी क काम करणा की अर झट फैसला लिंणा क्षमता सब्यौं क समणि ऐ। इल्लै धामी सब्यौं का भरोसामंद बणि ग्येन।

अपणु दूसर कार्यकाल मा बि धामी बौत अच्छु काम करणा छन अर बड़ा फैसला लिंणा छन। सरकारा कुछ फैसला देस अर दूसर प्रदसु तैं बि सीख देंणा छन। भर्ति इमत्यान वास्ता सकत नकल विरोधी कानून, समान नागरिक संहिता, ब्यटुलौं तैं सरकरि नौकरि म 30 प्रतिशत आरक्षण, राज्य आन्दोलकारियों तैं 10 प्रतिशत आरक्षण, धर्मान्तरणकानून, अंत्योदय परिवार तैं सालम तीन गैस सिलेण्डर फ्री अर अब सकत भू कानून जन्ना फैसलौं न धामी की एक अगल पछ्याण देस अर प्रदेसम बणै दे।

‘जी20’ कु कार्यक्रम, ‘उत्तराखण्ड ग्लोबल इन्वेस्टर समिट’ अर राष्ट्रीय खेल तैं उर्यौंणा बाद सर्या देसम धामी की हाम ह्यीं च अर धामी तैं बाजीगर बतौंण छन।

साल 2022 म भाजपा हाईकमान धामी तैं मुख्यमंत्री हि नी बणै बल ऊंका शपथग्रहण मा सर्या देसा बड़ा नेतौं तैं बुलैकि ऊंकु मनोबल तैं बि बढ़ै अर यु रैबार द्यायी कि औंण वलु बगत नै नेतौं कु होलु।

भाजपन यीं रणनीति तैं मध्यप्रदेस, राजस्थान, छत्तीसगढ़, हरियाणा अर अब दिल्ली म अगनै बढ़ै। विष्णुदेव साय, मोहन यादव, भजनलाल शर्मा, नायब सिंह सैनी अर रेखा गुप्ता तैं अपणि काबिलियत साबित करणा कु मौका दिये ग्यायी।
छ्वटा बड़ा प्रदेसुम नै लोगु तैं अगनै कैकि भाजपन सियासतम नै युगै सुरुवात कै याली। भाजपा हाईकमाना आंखौं न दिखै ज्यां त या पहल युवा नेतौं पर भरोसु कैकि ऊतैं अगनै बढ़ौंण की एक कोसिस च बस।