गैरसैंणा की उपेक्षा करणि च सरकार : कांग्रेस

देरादूण म भोळ मंगलबार 18 तारिक बिटि विधानसभा सत्र सुरु हूंणू च। जैमा विपक्ष सरकार पर घ्यरणा करणा खुणि त्यार च। दूसर तरफा राज्य आंदोलनकारियौं बि सरकार पर हमलाबार छन। ऊंकु ब्वन च कि सरकारन गैरसैंण तरफां आंखा फेरि दींन।

गैरसैंण मा बजट सत्र नी करौंण से नराज कांग्रेसी न बोलि सरकार गैरसैंणा की उपेक्षा करणि च।

नगर पंचैत अध्यक्ष अर यूथ कांग्रेसा प्रदेस उपाध्यक्ष मोहन भंडारी न बोलि कि भोळ कांग्रेस गैरसैंणा रामलीला मैदानम पेशावर कांड क महानायक वीर चन्द्र सिंह गढ़वालि क मूर्ति क ताळ बैठिकि गैरसैंण म बवज सत्र नी कर्यें जाणा कु विरोध कारली।
अर सुबेर ग्यारह बजि बिटि एकदिन कु बरत राखली।

उन्न बोलि सरकार गैरसैंणा की उपेक्षा करणि च। सरकार गैरसैंण अर उत्तराखण्ड का लोगुकि भवनौं दगड़ि खिलवाड़ करणि च। यांकु जवाब औंण वलु बगत मा जनता देलि।

मोहन भंडारी न बोलि मुख्यमंत्री लगातार गैंरसैंण उपेक्षा करणि च। गैरसैंण कु विकास सिरफ फैलु मा मा हि हूंण च।

वखि राज्य आंदोलनकारी व आंदोलनकारी संगठन का केन्द्रीय अध्यक्ष हरिकृष्ण भट्ट न बोलि कि गैरसैंण मा बजट सत्र नीं करणु गैरसैंणा दगड़ि ध्वका च।

उन्न बोलि राज्य आंदोलनकारियौं दगड़ि प्रदेसा जनता तैं बौत उमेद छायीं अर राज्य आंदोलन लडै़ गैरसैंण पर लड़ै ग्यायी। उन्न बोल गैरसैंणा तरफां बिटि सरकारन आंखा बुजिकि राज्य आंदोलनकारियों क सुपिनौं कु गौळ दबौंणा कु काम कायी।