जवाब द्यावा मुख्यमंत्री जी, जनता जवाब मंगणि च . . .

प्रदेसम निकाय चुनौ क घपरोळ मच्यूं च। सबि जनसेवक जनता बीच जैकि अपणा-अपणा दावा अर वादौं की बात जनता तैं बतौंणा छन।

प्रदेसम नगर पंचैत नगर पालिका परिषद क अलावा 11 नगर निगमु चुनौ छन। यांका बाद बि सर्या प्रदेसम नगर निगम देरादूण सबसे जादा हॉट सीट बणि च।

उन्न त निकाय चुनौ मा सड़क बिजली पाणि साफ सफै, स्ट्रीट लैट जन्नि मुद्दा ही खास हूंदन।

पर मुख्यमंत्री कु चुनौम औंणा बाद निकाय चुनौ का असल मुद्दा हि हरचीं ग्येन। मुख्यमंत्री निकाय चुनौ मा देसा, प्रदेसा मुद्दा, सनातन, मुस्लिम यूनिवर्सिटी जन्न मुद्दौ पर ऐग्ये।

मुख्यमंत्री खळाखळ ब्वना छन कि उत्तराखण्ड पैलु प्रदेस च होलु जख यूसीसी लागू करे जालु। मुख्यमंत्रि प्रदेस सकारक काम तैं गिणौंणा छन ब्वन छन सरकारन दंगा रोधी कानून बणै, पेपर लीक मामला म जु बि दोषी छायीं ऊतैं जेल भेजि।
हमन राम मंदिर बणै।

मुख्यमंत्री कांग्रेस तैं खुब क्वसणा (कोसना) छन। ब्वना छन कि जनता क समणि एक तरफा भाजपा च, ज्वा देवभूमि उत्तराखण्ड तैं अगनै बढ़ौंणा कु अर सनातन तैं बचौंणा कु काम करद। त दूसरि तरफा कांग्रेस च, जु बाबा केदारा नौं पर झुठ ब्वोलि की राजनीति करदि। कांग्रेस द्यब्तौं तैं बि राजनीति म बीच ल्याणा काम करद। कांग्रेस तैं सनातन विरोधी च, कांग्रेसन सदनि सनातन तैं खतम करणा कु काम कायी। कांग्रेस यीं कोसिस मा लगि च कि नगर निकाय चुनौ मा ऊंकु खाता खुलि ज्यां अर भष्ट्राचार कु खेल सुरु करे ज्यां।

मुख्यमंत्री मंच से ब्वना छन कि देस अर प्रदेसम द्वी इंजन काम करणा छन अर निकाय कु इंजन बि जोड़ि द्यो।

मुख्यमंत्रिक जी की इन्नु छ्वींयु पर सवाल खड़ा हूंणा छन। सवाल इल्लै कि देरादूण निगम मा त पांच साल बिटि अर वा से पैलि बि भाजपा कु हि इंजन लग्यूं छायीं।

मुख्यमंत्री तैं नगर निगम देरादूणा पन्द्रह सालु विकासा बारम बि बतौंण चैंद।

मुख्यमंत्री तैं बतौंण चैंद की पिछल 15 सालु मा नगर निगमा इंजनन क्य-क्य काम करिन। मुख्यमंत्री तैं बतौंण चैंद की वु इंजन एकदा चलणा बाद किलै खराब ह्वेग्ये। जु भाजपा तैं नै इंजन ख्वजण पोड़िग्ये।

मुख्यमंत्री तैं बतौंण चैंद की देरादूणम 129 मलिन बस्ती कनकैकि की पैदा ह्वेग्यींन, अर यु मलिन बस्तिम 40000 से जादा मकान कनकैकि बणिग्येन।

मुख्यमंत्री तैं बतौंण चैंद देरादूण जल निकासी वास्ता क्य काम करेग्येन।

मुख्यमंत्री तैं बतौंण चैंद कि देरादूणम यातायात जामा समस्या वास्ता क्य काम करे ग्यींन?

मुख्यमंत्री तैं बतौंण चैंद कि पार्किंगा दिक्कता वास्ता कतगा पार्किंग बणै ग्यींन?

मुख्यमंत्री तैं बतौंण चैंद कि रिस्पना, बिन्दाल तैं बचौंणा वास्ता पिछल 15 सालु मा क्य-क्य काम करे ग्यींन? कूड़ा निस्तारण वास्ता, क्य करे ग्यायीं, हरति दून, स्वच्छ देरादूणा वास्ता क्य-क्य काम करे ग्येन?

मुख्यमंत्री तैं बतौंण चैंद कि पिछले पांच सालु मा जु भष्ट्राचार कु खेल सफै कर्मचारियों तैंं लेकैकि देहरादूण नगर निगम मा ख्यलें ग्यायी, वीं जांचा बारम क्य ह्वे।

मुख्यमंत्री तैं देरादूणै जनता तैं यु बि बतौंण चौंद की क्य देस अर प्रदेसम लग्यां द्वी इंजन सै ढ़ग से काम नीं करणा छन? क्य इल्लै मुख्यमंत्री ऊ द्विया इंजनु तैं ढसकौण (धक्का देना) वास्ता अब तिसरु इंजन मांग करण छन।

अब निकाय चुनौ मा मुख्यमंत्री कु औंण से बल भाजपा तैं कतगा फैदा हूंद, यु त भवेष्य बतालु पर अबि त मुख्यमंत्रिक चुनौवी भाषणु मा कांग्रेस अर निर्दलियौं पर गुर्रौंणा छन कि अगर यीं जीतिकि ऐ जाला त झणि क्य (अगास ऊंदू अर , धरति मत्थी) ह्वे जालु।

साफ च कि मुख्यमंत्री जी चाणा छन कि प्रदेसम चौछ्ड़ि हमरि हि हमरि हाम रयां बस। जै से क्वीं सड़क बिजली पाणि, साफ सफै, स्ट्रीट लैट जन्ना, जनमुद्दा पर क्वीं बात ही न कै सक्यां, क्वीं हमसे सवाल नीं पूछि सक्यां।