कांग्रेस निकाय चुनौ जितण कु स्वींणा दय्खणि च : मुख्यमंत्री धामी

देरादूण। उत्तराखण्ड निकाय चुनौम बोटिंग से पैलि सबि राजनीतिक पार्टी का स्टार प्रचारक प्रचार मा जुट्यां छन। स्टार प्रचारक मुख्यमंत्री धामिन टिरी नगर पालिका अध्यक्ष पदा उमेदवार मस्ता सिंग नेगी वास्ता बोट मंगिन। ऐ मौका पर मुख्यमंत्री कांग्रेस पार्टी पर बि हमला कायी।

मुख्यमंत्रिन बोलि कि जख प्रदेस सरकार विकास फैसला लिंणिच अर प्रदेस तैं अगनै बढ़ौंणा कु काम करणि च, वखि कांग्रेस अर हौरि पार्टी, जु सदनि विकास अर जनकल्याणकारी योजना कु विरोध करणि रैंदन। जनता क समणि एक तरफा भाजपा च, जु प्रधानमंत्री मोदी क नेतृत्व मा देवभूमि उत्तराखण्ड तैं अगनै बढ़ौंणा कु अर सनातन तैं बचौंणा कु काम करद। त दूसरि तरफा कांग्रेस च, जु बाबा केदारा नौं पर झुठ ब्वोलि कि राजनीति करणा म पिछने नी रैंदि। कांग्रेस द्यब्तौं तैं बि राजनीति म बीच ल्याणा काम करदि।

मुख्यमंत्रिन बोलिकि एक तरफा भाजपा सरकार च, जु उत्तराखण्ड तैं अग्वानया (अग्रणी) प्रदेस बणौंणा वास्ता काम करणि च, त वखि दूसर तरफा कांग्रेस च, जु यीं कोसिस मा लगि च कि नगर निकाय चुनौ मा ऊंकु खाता खुलि ज्यां अर भष्ट्राचार कु खेल सुरु करे ज्यां। उन्न बोलि कि अगर गलति से बि कांग्रेस अर निर्दलीय चुनौ जीतिकि ऐ जाला त औंण वला पांच सालु तक यीं ब्वलला कि हमत क्वीं काम नीं कै सकदा, हमरि क्वीं सुणै नीं च। हमरि क्वीं सरकार ही नीं च। हमरि सरकार आली त काम करला। अब कब सरकार आली, कब नौ मन तेल होलु, कब राधा नाचली।

मुख्यमंत्री धामिन बोली कि पैलि धर्मांतरण कैकि प्रदेसा मूल अन्द्वारा दगड़ि छेड़ि करे जाणि छायीं, हमन धर्मांतरण क खिलाप सखत कानून बणै अर दस साल तक की सजा तय कायी। मुख्यमंत्रिन बोलि कि हमरि सरकारन दंगा रोधी कानून बणै अब पदेसम क्वीं तबि घपरोल कारलु, मारपिटै करालु या सरकरै जैदाद कु नुकसान कारलु त यां कु सबि खरचा वै मनखि से बि वसूल करे जालु, नकल विरोधी कानून हमन हि बणै। तीन सालुम हमन 19 हजार से जादा सरकरि नौकरि दींन।