घरवळि तैं टिकट नी मिलण पर कांग्रेस उपाध्यक्ष मथुरा दत्त जोशी कायी बगावत

देरादूण। उत्तराखण्ड निकाय चुनौ कु शंख क्य बिजि की पार्टी नेतौं कु नराजगी बि समणि औंण बैठिग्ये। कांग्र्रेस हूयां या भाजपा द्वीय पार्टिम कतगै इन्ना नेता छन, जौन टिकट नी मिलणा बाद पार्टिम दगड़ि बगावत कै दे।
कांग्रेस पार्टिन जन्नि मेयर पदा उम्मेदवारु घोषणा कायी उन्नि कांग्रेस उपाध्यक्ष मथुरा दत्त जोशी न अपणि पार्टी कांग्रेसा खिलाप बगावत कै दे। मथुरा दत्त जोशी इल्लै नराज छन कि ऊंकी घरवळि तैं पिथौरागढ़ सीट बिटि मेयर कु टिकट नी मिलि।

कांग्रेस उपाध्यक्ष मथुरा दत्त जोशी इतगा नराज छन कि उन्न यख तक बोलि कि अब मि पार्टी छ्वण का बारम बि स्वचणु छौ। उन्न बोलि कि कांग्रेस मा टिकट अर पद सिरफ शराब माफिया अर खनन माफियौं खुणि बच्यां छन। उन्न बोलि मि सालु बिटि पार्टी वास्ता काम करणु छौ अर अबकदा मि चाणु छायीं कि मेरि घरवळि रुक्मणि जोशी तैं पिथौरागढ़ नगर निगम बिटि टिकट दिये ज्यां। उन्न बोलि पिथौरागढ़ सीट आरक्षित च। अर मेरी घरवळि न कांग्रेस पार्टी
टिकट खुणि आवेदन कर्यूं छायीं।

मथुरा दत्त जोशीन बोलि कि मि 48 सालु बिटि पार्टी वास्ता काम करणु छौ। झणि कतगै नेता ऐन अर पार्टी तैं छोड़िकि चलिग्येन, पर मिन सदनि पार्टी कु साथ द्यायी। मिन सालु पार्टी खुणि काम कायी, पर मितैं आज तक विधायक बणणा कु मौका तक नीं दिये ग्यायी।

अपणि घरवळि तैं टिकट नी मिलणा कु सर्या ठीकरू जोशीन हरीश रावत, प्रीतम सिंह अर यशपाल आर्य क मुण्ड मा फोड़ि। उन्न बोलि मिन अपणि नराजगी पार्टी तैं बतै याली। उन्न बोलि पार्टीन मितैं ध्वका द्यायी। उन्न बोलि कि अबि मि पार्टी खुणि काम नी करलु अर जरूरत प्वाड़लि त अपणा पद बिटि इस्तीफा बि द्यूलु अर जल्दी क्वीं फैसला करलु, मितैं इन्न जगा रैंणा बिलकुल पंसद नीं च जख कार्यकतौं की क्वीं कदर नीं च।