गणतंत्र दिवस परेड मा दिख्यें जाली उत्तराखण्ड का साहसिक खेलु की झांकी

द्वी हजार पच्चीस गणतंत्र दिवस पर नै दिल्ली कर्तव्य पथ मा दिख्यें जाण वलि झांकी मा उत्तराखण्ड प्रदेसा ‘साहसिक खेल’ (एडवेन्चर स्पोर्ट्स) कु भारत सरकारन चयन कै याली। बतै दियां साल 2023सम उत्तराखण्डा मानसखण्ड झांकी तैं पैलु स्थान मिलि छायीं।

मुख्यमंत्रीन धामिन बोलि कि या हमर प्रदेस खुणि गर्व करणा कु विषय च कि गणतंत्र दिवस परेडा वास्ता उत्तराखण्डा झांकी कु चयन करे ग्यायी। झांकी मा उत्तराखण्डा पछ्याण प्राकृतिक सौंदर्य अर साहसिक खेला सम्भौवना तैं दिख्यें ग्यायी।

मुख्यमंत्रिन बोलि कि मि झांकी तैं बणौंणा वला सबि कलाकारू अर अधिकारियों तैं बधै। उन्न बोलि कि हम यीं झांकी क जरिया देवभूमि उत्तराखण्ड तैं पर्यटन अर साहसिक खेलु कु केद्र बणौंणा दिसा मा अगनै बढ़णा छा।

महानिदेशक सूचना बंशीधर तिवारी न बतै कि अक्टूबर 2024 म रक्षा मंत्रालय, भारत सरकारा बणि विशेष समिति तैं प्रदेसु अर केन्द्र शासित प्रदेसु बिटि प्रस्ताव भ्यजें ग्यीन। नोडल अधिकारी अर संयुक्त निदेशक, सूचना के. एस. चौहान न विशेष समिति क समिणि उत्तराखण्डा झांकी तैं दिखै।

महा निदेशकन बतै कि भारत सरकार 21 दिसम्बर 2024 खुणि चिट्ठी लेखिकि बतै कि उत्तराखण्ड प्रदेसा झांकी कु मॉडल अर संगीत कु चयन करे ग्यायी।

उत्तराखण्ड प्रदेसा झांकी म ऐसु अगनै ऐपण बणौंणि उत्तराखण्डि ब्यटुला तैं दिख्ये ग्यायी त झांकी क बीच अर पिछल भाग मा साहसिक खेल, रॉक क्लाइम्बिंग, पैराग्लाइडिंग, बन्जी जम्पिंग हल साइकलिंग, ट्रैकिंग, रिवर राफ्टिंग, औलिम स्कीइंग अर ऋषिकेश मा जिप-लाइनिंग अर रॉक क्लाइम्बिंग तैं दिख्ये ग्यायी।