जनवरी 2025 तक प्रदेसम समान नागरिक संहिता लागू ह्वे जाली: धामी

उत्तराखण्डम जनवरी 2025 बिटि समान नागरिक संहिता लागू ह्वे जाली। यांकी सर्या त्यरि पूरि ह्वेग्येन। उत्तराखण्ड आजादी बाद देस कु पैलु प्रदेस होलु जख समान नागरिक संहिता लागू ह्वे जाली।

या बाद उत्तराखण्डा मुख्यमंत्री धामिन बोलि। सचिवालय मा उत्तराखण्ड निवेश अर आधारिक संरचना विकास बोर्डा बैठक म मुख्यमंत्री धामिन बोलि कि प्रदेस सरकारन समान नागरिक संहिता लागू करणा दिसा म सबि त्यरि कै याली। उन्न बोलि कि मार्च 2022 म प्रदेसम नै सरकार बणणा बाद मंत्रिमंडला पैलि बैठक मा हि प्रदेसम समान नागरिक संहिता लागू करणा वास्ता एक समिति बणौंणा कु फैसला कै छायी।

सेवानिवृत न्यायाधीश रंजना प्रकाश देसाई क अध्यक्षता मा एक कमेटी बण्यें ग्यायी। समिति क रिपोर्टा अधार पर 7 फरवरी खुणि विधानसभा बिटि समान नागरिक संहिता विधेयक 2024 पारित करे ग्यायी। ये विधेयक पर महामहिम राष्ट्रपति क मंजूरि मिलणा बाद 12 मार्च 2024 खुणि नोटिफिकेशन जारी करै ग्यायी। समान नागरिक संहिता वास्ता पूरि नियमावली त्यार ह्वेग्ये। अर प्रदेस जनवरी बिटि समान नागरिक संहिता लागू करणा वास्ता पूरि तरौं त्यार च। मुख्यमंत्रिन अधिकारियौं तैं निर्देश दींन अर बोलि संहिता क प्रावधान लागू करणा वास्ता कार्मिकौं तैं जरुरी प्रशिक्षण दिये ज्यां अर सबि जरुरी सुविधौं कु बन्दबस्त करे ज्यां। यांका दगडि जादा से जादा सेवाओं तैं ऑनलैन करे ज्यां।

मुख्यमंत्रिन बोलि कि लोगु का वास्ता समान नागरिक संहिता लागू करणा खुणि पोर्टल अर मोबाइल एप भी त्यार करे ग्यायी। जैमा पंजीकरण, अपील अर हौरि सुविधा ऑनलैन दिये जाणि छन।

मुख्यमंत्रिन बोलि कि जनवरी 2025 मा उत्तराखण्डम समान नागरिक संहिता लागू ह्वे जाली। उत्तराखण्ड कु समान नागरिक संहिता कानून, सबका साथ सबका विकास अर सबका विश्वासा मूल भावना पर चलिकि समाज तैं नै दिसा देलु। अर यु कानून खास कैकि देवभूमि का व्यटुलौं अर बच्चों तैं हौरि तागत देंणा कु काम कारलु।