उन्नीस सौ इक्कतरा लड़ै, स्वतंत्र भारता इतिहास कु स्वर्णिम अध्याय, जु हरेक भारतीय खुणि गौरव अर प्रेरणा देन्द : धामी
मुख्यमंत्री धामिन विजय दिवसा मौका पर देरादूणा गांधी पार्क मा शहीद स्मारक पर फुळ चढ़ै कि शहीदु तैं श्रद्धांजलि द्यायी। मुख्यमंत्री न बोलि कि भारतक सैनिकौंन 1971तरा लड़ै देसा अखंडता अर स्वाभिमाना रक्षा हि नी कायी बल अपणा कौशलन दुसमन तैं पटकै दे।
ऐ मौका पर मुख्यमंत्रिन प्रदेसा शहीद सैनिकौं की वीरांगनौं अर वीर माताओं तैं उत्तराखण्ड बस मा निःशुल्क जातरा घोषणा कायी। मुख्यमंत्रिन उन्नीस सौ इक्कतरै लड़ै क वीर सैनिक अर ऊंकी कुटुम्दरि तैं सम्मानित कायी।
मुख्यमंत्रिन बोलि कि उन्नीस सौ इक्कतर मा पाकिस्तान दगड़ि लड़ै, स्वतंत्र भारता इतिहास कु इन्नु स्वर्णिम अध्याय च, जु हरेक भारतीय तैं गौरव अर प्रेरणा देन्द। उन्नीस सौ इक्कतरा लड़ै मा हमरि सेना न सर्या दुन्या तैं बतै कि भारत अपणि संप्रभुता की रक्षा कै सकदु , अर जरूरत प्वड़णा पर मानवता अर न्याय की रक्षा खुणि बि खडु ह्वे सकदु।
मुख्यमंत्रिन बोलि कि प्रदेस सरकार सैनिक अर ऊंकी कुटुम्दरि कल्याणा वास्ता प्रतिबद्ध च। प्रदेस सरकार जख एक तरफा सैनिक अर ऊंका आश्रितौं तैं मिलण वलि अनुदान राशि तैं बढ़ौंण कु काम कायी शहीद सैनिकौं का आश्रितौं तैं प्रदेस सरकार न सरकरि नौकरि मा वरीयता अधार पर भर्ति करणा फैसला कायी।
उन्न बोलि कि उत्तराखण्ड सरकार न वीरता पदक से मिलण वलि सम्मानित सैनिक तैं मिलण वलि अनुदान राशि तैं बि बढ़दे। अनुदार राशि तैं लेकैकि कुटुम्दरि मा क्वीं गलत ना हूंया, या का वास्ता प्रदेस सरकारन शहीदु क ब्वे-बुबा अर घरवलि द्वियौं तैं बराबर अनुदान राशि दिंणा कु काम कायी।
ऐ मौका पर सैनिक कल्याण मंत्री गणेश जोशी, शहरी विकास मंत्री प्रेमचंद अग्रवाल, विधायक खजान दास, सचिव दीपेंद्र चौधरी, जिलाधिकारी देरादूण सविन बंसंल, एसएसपी अजय सिंह, निदेशक सैनिक कल्याण ब्रिगेडियर अमृत लाल (से.नि), मेजर जनरल सम्मी सबरवाल (से.नि), ब्रिगेडियर के.जी बहल (से.नि) अर पैल्यक सैन्य अधिकारी छायीं।