मुख्यमंत्रिन धामिन ‘नये भारत की बात उत्तराखण्ड के साथ’ कॉन्क्लेव मा भाग ल्यायी

मुख्यमंत्री धामिन आज देरादूण मा उर्यूं ‘नये भारत की बात उत्तराखण्ड के साथ’ कॉन्क्लेव मा भाग ल्यायी।
ऐ मौका पर मुख्यमंत्रिन बोलि कि हमन साल 2022 म उत्तराखण्डा देवतुल्य जनता क समणि सौं ले छायीं कि सरकार बणदै हम प्रदेसम समान नागरिक संहिता कानून बणौंणा वास्ता कारवै करला।

मुख्यमंत्रिन बोलि कि समान नागरिक संहिता क वास्ता हमन कमेटी बणै। यीं कमेटिन रिपोर्ट त्यार करणा बाद, सरकारन विधानसभम विधेयक पारित कायी अर राष्ट्रपति तैं भेजि। राष्ट्रपति न विधेयक तैं अपणि मंजूरि दे द्यायी। उन्न बोलि समान नागरिक संहिता तैं लागू करणा वास्ता प्रदेस तेजी से अगनै बढ़ि, यांका सर्या दरोमदार उत्तराखण्डा देवतुल्य जनता तैं जान्द।
मुख्यमंत्रिन बोलि कि ह्यूँदा मैनौं मा श्रीकेदारनाथ क पूजा ओंकारेश्वर मंदिर ऊखीमठ, भगवान बदरीनाथा पाण्डुकेश्वर नर्सिंग मंदिर ज्योर्तिमठ, माँ यमुनोत्री क खरसाली अर मांँ गंगोत्री क मुखबा म पूजा हून्द। प्रदेस सरकारन यु जगो पर ह्यूँदा जातरा सुरु करणा दगड़ा-दगड़ि हौरि पौराकिण जगो तैं बि विकसित करे जाणु च।

मानसखण्ड मंदिर माला मिशन मा पैलि 16 मंदिर क्षेत्रु तैं विकसित करे जाणु च।

उन्न बोलि बल उत्तराखण्ड मा निवेश बढ़ौंणा वास्ता पिछल साल प्रदेसम इन्वेस्टर समिट उर्यें ग्यायी। जैमा 3.56 लाख करोड़ से जादा एमओयू करे ग्यीन। प्रदेसम निवेश वास्ता 30 से जादा नीति बण्यें ग्यीन। अर सिंगल विंडो सिस्टम तैं मंजूरि दिये जाणि च।

मुख्यंमत्रिन बोलि कि उत्तराखण्ड प्रदेस स्थापना रजतोत्सव साल मा पौछिग्यें। प्रदेसा सर्या देस मा अग्वानया (अग्रणी) प्रदेस बण्यां या का वास्ता सरकार खळाखळ कोसिस करणि च। प्रदेस सरकार औंण वला 25 सालु की जरुरत तैं देखिकि विकास योजनौं पर काम करणि च। उन्न बोलि प्रधानमंत्री कु साल 2047 तक विकसित भारता सौं तैं पूरि करणा वास्ता उत्तराखण्ड पूरि कोसिस करणु च।