यमुना घाटी, टीकरा टॉप मा बणलु खेल कु मैदान अर हेलीपैड मुख्यमंत्रिन कायी घोषणा

मुख्यमंत्री धामिन आज उत्तरकाशी क डामटा म उर्यूं यमुना घाटी क्रीड़ा अर सांस्कृतिक विकास समारोह मा भाग ल्यायी। ऐ मौका पर मुख्यमंत्रिन यु समारोह उर्यौं वास्ता 5 लाख रुप्या अर मुगरसंती पट्टी क पैंसठ गौं का कुल द्यबता रुद्रेश्वर महाराज कु डांडा देवराणा कौथिग तैं राजकीय कौथिग मा सामिल करणा अर टीकरा टॉप मा खेल कु मैदान अर हेलीपैड बणौंणा घोषणा बि कायी।

मुख्यमंत्रिन बोलि कि डामटा तोक मा पॉलीटेक्निक संस्थान क दरकार च यांकु फैसला सै बगत मा लिये जालु।

मुख्यमंत्रिन कार्यक्रम उर्यौंणा पर लोक त्योवार इगास बग्वाल पर शुभकामना द्यायीं अर बोलि कि ऐ तोका लोगु न अपणि समृ़द्ध अर सांस्कृति विरासत तैं बचै अर खेलु म खिल्वारू तैं प्रोत्साहित करणा खुणि ऐ समारोहा जरिया बौत भलि कोसिस कायी। प्रदेस सरकार इन्न कोसिसत तैं सदनि प्रोत्साहन देली। मुख्यमंत्रिन बोलि कि ज्वानु की प्रतिभा अर कौशल विकास, खेलकुद अर सांस्कृतिक गतिविधियों का वास्ता ऐसु बजटम डेढ़ हजार करोड़ रुप्यौं से जादा पैसा कु बन्दबस्त करे ग्यायी। उन्न बोलि उत्तराखण्ड तैं राष्ट्रीय खेल करणा कु मौका मिलि। यां से प्रदेसम खेल तैं बढ़ावा अर प्रदेस खिल्वारु तैं अपणि काबलियत तैं साबित करणा कु मौका मिललु।

मुख्यमंत्रिन बोलि कि यमुना घाटी रौतेली च ये तोकम पर्यटन अर तीर्थाटना विकास बौत सम्भौवना छन। सरकार न यमुना घाटी तोक का धार्मि तोक तैं विकसित कैकि श्रीकृष्ण यमुना तीर्थ सर्किट विकसित करणा कु काम करणि च। जैमा यमुना घाटी मा गदनौं का छाल घाट बणै कि खास आरती क बन्दुबस्त करे जालु। उन्न बोलि चारधाम ऑल वेदर रोड जरिया ये क्षेत्रम सड़कियौं तैं चौडु करणा खुणि प्रदेस सरकार कोसिस करणि च। डामटा से अगनै यमुनोत्री रस्ता तैं चौडु करणा खुणि टेंडर ह्वेग्ये।
मुख्यमत्रिन बोलि कि यमुना घाटिम रेल लैन बणौंणा वास्ता पर केन्द्र सरकार से विनति करे ग्यायी।

ऐ मौका पर पुरोला विधायक दुर्गेंश्वर लाल, जिलाधिकारी डॉ. मेहरबान सिंह बिष्ट, पुलिस अधीक्षक अमित श्रीवास्तव, मुख्य विकास अधिकारी एसएल सेमवाल, अपर जिलाधिकारी देवानंद शर्मा, उप जिलाधिकारी बृजेश कुमार तिवारी, पुलिस उपाधीक्षक सुरेन्द्र सिंह भंडारी, मेला समिति का अध्यक्ष बचन सिंह चौहान, पूर्व जिला पंचायत अध्यक्ष नारायण सिंह चौहान, भाजपा जिलाध्यक्ष सत्येन्द्र राणा, चमन सिंह चौहान, सुलोचना गौड़, दयाराम थपलियाल बि छायीं।