सड़क दुर्घटना, पाड़ कु जोग अर दुर्घटना तैं रवक्णु सरकार वास्ता चुनौती बणिग्ये

मरचूला मा बस दुर्घटनै ज्वा घटना ह्वे, यीं घटना से प्रदेसा रैवासी बौत दुखी छन। यीं दुर्घटना बाद एकदा दुबरा सड़क सुरक्षा तैं लेकैकि कई सवाल खड़ा हूंणा छन। सल्टा ये हादसम 36 से जादा लोग म्वोरि ग्यीन अर कतैग लोग अबि अस्पतालम इलाज करौंणा छन। सल्ट तोकम यु पैलु सड़क हादसा नीं च। यां से पैलि 13 मार्च 2018 म देघाट बिटि रामनगर जाणि बस खोलियाधार टोटाम 250 फिट भ्याळ मा लमड़ि ग्ये छायीं। ये हादसम 13 जातरी टुणपट ह्वेग्ये छायीं अर 14 से जादा लोग घैल ह्वे छायीं। 25 मई 2016 म मल्ट मछोडई म जीएमओयू क बस भ्याळ लमड़ि छायीं। यीं बस दुर्घटनम 9 जातरी टुणपट्ट त 13 से जादा लोग घैल ह्वे छायीं। अर अब रामनगर आणि बस अल्मोड़ा मरचूला म 150 फिट भ्याळ लमड़ि ग्ये। जैमा 36 लोग म्वारि ग्येन अर 27 घैल ह्वेग्येन।

अब जु लोग यीं दुर्घटना म बच्यां छन, वु न बतै मीडिया तैं बतै बल गाड़िम इतगा लोग भ्वरयां छायीं, गाड़िम खुट्टु धरणा जगा बि नी छायीं। 42 सीटा गाड़िम 60 से जादा जातरी छायीं। बसम ब्यटुला, बुड़यां, अर ज्वान छायीं, जु बग्वाल मनौंणा बाद अपणि-अपिण नौकरि पर जाणा लोग छायीं।

भ्याळ लमडण से अद्दा घण्टा पैलि बस सड़कि का खडवळौं मा गड़मड-गड़मड करण बिटिग्ये, तबि डरैबरन लोगु तैं बस बिटि भ्वां उतरणा खुणि बोलि, पर घौर जाणा जल्दिम कैन बि डरैबरा बात नी मानि। गाड़ी तेजी से चलणि छायीं, एक बैंड पर बस कु पट्टा (कमानी) टुटिग्ये अर गाड़ी डरैबरा बस बिटि भैर ह्वेग्ये अर भ्याळ म लमड़िग्ये। वखि यीं घटना बाद या बात बि समणि ऐ कि डैरबर मानसिक तनाव म छायीं। जातरिन बतै कि डरैबर तैं खळाखळ फोन आणा छायीं। अर पैंसौं क बाद हूंणि छायीं। डरैबन पिलसेणु (परेशान) छायीं अर वैंकी टक गाड़ि चलौंणा न कम, बल कखि हौरि लगि छायीं।

यीं घटना क बाद सबसे बडु सवाल त यौं च कि यीं घटना कु जिम्मेबार कौच? जै कारण इतगा लोगुक मौत ह्वेग्ये। क्य या खुणि पाडै़ सड़क, बड़ा-बड़ा भ्याळ, बस या डरैब जिम्मेबार च? हां यी घटना कु बडु जिम्मेबार डरैबर च। यीं घटनम डरैबरै लापरवै त छैंच, त वखि दुसर तरफा डरैबर से जादा प्रशासनै लापरवै बि कु कम दोषी नीं च। खराब सड़क, जगा-जगों पर सड़कियौं मा खडवळा अर गाड़िम क्षमता से जादा लोग जु इन्न घटना कु कारण बणि, यां तैं रवक्णा जिम्मेबरि प्रशासना की हि त च।

यीं घटना बाद मुख्यमंत्री झट मजिस्ट्रीयल जांच आदेश दे दी अर द्वी एआरटीओ तैं निलंबित कै दे। किलैकि गाड़ियुम क्षमता से जादा जातरी नीं हूंया या खुणि पैलि अधिकारियौं तैं आदेश दियां छायीं यांका बाद बि यु हादसा ह्वे।

अब मजिस्ट्रीयल जांचम क्य होलु यु व भवेष्य पुटगम च, पर हां अब यीं जांच से कैंथै क्वीं फरक नीं प्वड़दु। किलैकि यीं घटना से पैलि ह्वीं घटनौं की मजिस्ट्रीयल जांच म क्य ह्वे कैतैं कुछ बि पता नीं च। उन्न त सरकारै तरफां बिटि सड़क दुर्घटना तैं रवक्णा वास्ता खुब कारवै करे जांद पर भ्वां मा कुछ बि नीं हूंदू। यीं कारण च कि पाड़म इन्नि दुर्घटना पाड़ा कु जोग (भाग्य) अर सरकार खुणि दुर्घटना रवक्णु एक बौत बड़ी चुनौती बणिग्ये।