राज्य स्थापना दिवसा मौका पर मुख्यमंत्रिन राज्य आंदोलनकारियों तैं कायी सम्मानित

मुख्यमंत्री धामिन राज्य स्थापना दिवसा मौका पर रूड़ियोंक विधानसभा भराड़ी सैंण गैरसैंण मा उर्यूं कार्यक्रम मा भाग ल्यायी।
ऐ मौका पर उन्न प्रदेसा रैवासियों तैं उत्तराखण्ड बण्यां 24 साल पूरा हूंण अर रजन जयंती बरसम मौका पर बधै अर शुभकामना द्यायी।

मुख्यमंत्रिन देसा खुणि बलिदान देंण वला वीर ज्वानु अर राज्य निर्माणा सबि अमर शहीदु तैं श्रद्धांजलि द्यायी।

मुख्यमंत्रिन बोलि कि उत्तराखण्ड प्रदेस रजय जयंती बरसम प्रवेश करणु च। उन्न बोलि यु चौबीस सालु मा जनतै मदत से प्रदेस हरेक तोकम अगनै बढ़णु च। उन्न बोलि ये दशक तैं उत्तराखण्डा दशक बणौंणा वास्ता लोगुकि सहयोगन प्रदेस सरकार छ्वटि अर लम्बी योजनों पर काम करणि च।

मुख्यमंत्रिन बोलि कि आज सबि तोकुम उत्तराखण्ड देसा अग्वानया प्रदेस बणदै जाणु च। नीति आयोगा जारी सतत विकास लक्ष्य मा प्रदेस तैं पैलि स्थान मिलि। ईज ऑफ डुइंग बिजनेस म प्रदेस तैं एचीवर्स अर स्टार्टप म लीडर्स क श्रेणी मिलि च। जीएसडीपी म 33 प्रतिशत बढ़िग्ये। उत्तराखण्ड रुजगार देंणा मामला मा अग्वान्या प्रदेस बणिग्ये। बेरुजगारी दर मा 4.4 प्रतिशत कमी ह्वेग्ये।
राष्ट्रीय खुल उर्यौंणा कु प्रदेस तैं मौका मिलणु च।

मुख्यमंत्रिन बोलि बल केदारनाथ धाम तैं भव्य अर दिव्य बणौंणा काम खळाखळ हूंणू च। बदरीनाथ धाम मा मास्टर प्लाना जरिया विकासा काम चलणा छन। इन्नि मानसखंड मंदि माला मिशन कु पैलि चरण मा 16 मंदिरू तैं विकसित करे जाणु च।

ऋषिकेश-कर्णप्रयाग रेल परियोजना पर तेजी से काम चलणु च। उन्न बोल झट पाड़म रेल कु सुपिन पूरु हूंण वलु च।

मुख्यमंत्रिन बोलि कि प्रदेस सरकारन सरकरि नौकरिम व्यटुळों तैं 30 प्रतिशत आरक्षणा दगड़ि सहकारी समितियों म बि प्रदेसा व्यटुलों तैं 33 प्रतिशत पद आरक्षित रखणा कु फैसला बि करे ग्यायी।
मुख्यमंत्रिन नारी सशक्तिकरण योजना, लखपति दीदी योजना अर मुख्यमंत्री आंचल अमृत योजना दगड़ि व्यटुलों तैं तागत अर अपणा खुट्टौं पर खडु करणि च।

ऐ मौका पर पुलिस अर एनसीसी क ज्वानु न विधानसभा मा सेरेमोनियल परेड कायी। स्थापना दिवसा मौकापर विकास विभागान बहुउद्देशीय शिविर लगैकि एक प्रदर्शनी लगै। ऐ मौका पर मुख्यमंत्रिन राज्य आंदोलनकारियों तैं पुष्प माला अर शॉल देकैकि सम्मानित बि कायी।