मुख्यमंत्रिन बूनु (झाडू) लगैकि द्यायी स्वच्छता कु रैबार

मुख्यमंत्री धामिन राज्य स्थापना दिवसा एक दिन पैलि रेसकार्स म उर्यूं सफै कार्यक्रम मा भाग ल्यायी अर बूनु (झाडू) लगैकि स्वच्छता कु रैबार द्यायी।

ऐ मौका पर मुख्यमंत्रिन नगर निगमम स्ट्रीट लैट का बारम शिकैत करणा वास्ता बण्यूं क्यू आर स्कैनर कु बि शुभारंभ कायी।
यु स्कैनर देरादूणा नगर निगम मा लग्यां स्ट्रीट लैटा खम्बौं पर लग्यें जाला। जै तैं स्केन कैकि क्वीं बि शिकैत कै सकदु।
मुख्यमंत्रिन बोलि कि मार्चुला म हूंयी बस दुर्घटना म दिवंगत हूंया लोगुक यादम आज सर्या प्रदेसम स्वच्छता अर सेवा कार्यक्रम उर्यें जाणा छन। मुख्यमंत्रिन बस मा घलै लोगु क झट ठीक हूंणा भगवान से अरज कायी।

मुख्यमंत्रिन बोलि बल प्रधानमंत्रिन 10 साल पैलि चल्यूं ^स्वच्छ भारत अभियान’ आज सर्या देस म स्वच्छता क वास्ता लोगु तैं जागरुक करणु च। अर प्रधानमंत्रि कु स्वच्छ अर स्वस्थ भारत कु स्वींण सच हूंणू च।

मुख्यमंत्रिन प्रदेसा रैवासियौं से विनति कायी कि स्वच्छता तैं अपिण जिन्दगि कु हिस्सा बणैकि देवभूमि उत्तराखण्ड तैं साफ रखणा म सरकारै मदत कर्यां। उन्न बोलि उत्तराखण्ड राज्य रजत जयंती बरसम खुट्टा रखणु च। यु चौबीस सालु म हमरि देवतुल्य जनतै मदतन प्रदेस हरेक तोकम तेजी से अगनै बढ़णु च।

मुख्यमंत्रिन बोलि कि आज सबि तोकुम उत्तराखण्ड देसा अग्वानया प्रदेस बणदै जाणु च। नीति आयोगा जारी सतत विकास लक्ष्य मा प्रदेस तैं पैलि स्थान मिलि। ईज ऑफ डुइंग बिजनेस म प्रदेस तैं एचीवर्स अर स्टार्टप म लीडर्स क श्रेणी मिलि च।
जीएसडीपी म 33 प्रतिशत बढ़िग्ये। उत्तराखण्ड रुजगार देंणा मामला मा अग्वान्या प्रदेस बणिग्ये। बेरुजगारी दर मा 4.4 प्रतिशत कमी ह्वेग्ये।

ऐ मौका पर शहरी विकास मंत्री प्रेमचंद अग्रवाल, विधायक विनोद चमोली, खजान दास, निवर्तमान मेयर सुनील उनियाल गामा, सचिव शहरी विकास नितेश झा, जिलाधिकारी देरादूण सविन बंसल, उपाध्यक्ष एमडीडीए बंशीधर तिवारी न बि बूनु लगै की स्वच्छता कार्यक्रम मा भाग ल्यायी।