तृतीय केदार भगवान तुंगनाथ जी का पाट ह्यूंदा मैनौं खुणि ह्वेग्येन बन्द

तृतीय केदार भगवार श्री तुंगनाथ मंदिरा पाट शुभ मूहूर्त पर आज 11 बजि ह्यूंदा मैनौं खुणि बन्द ह्वेग्येन। कपाट बंद हुंणा बाद भगवान तुंगनाथा उत्सव डोलिन ढोल-दमौ अर बाबा तुंगनाथ जय हो क दगड़ि पैलि पड़ाव चोपाता खुणि पैटिग्ये।

मंदिरा कपाट बंद हूंण बाद मंदिर समिति क कर्मचारी, श्रद्धालुऔं न मंदिरा परिक्रमा कायी जै का बाद अखोड़ी अर हुडु गौं का हक-हकूकधारी बि भगवान तुंगनाथ चलविग्रह डोलिक दगड़ि चोपाता खुणि पैटिग्येन। आज भगवान तुंगनाथ चल विग्रह डोली बासा चोपता मा राली।

5 अर 6 नवंबर चलविग्रह डोली दूसर पड़ाव भनकुन बासा राली। 7 नवंबर खुणि भगवान तुंगनाथा चल विग्रह डोली शीतकालीन गद्दी स्थल श्री मर्केटेश्वर मक्कूमठ मंदिर म विराजमान होलि।