केदारनाथ उपचुनौ : प्रतिष्ठा कु चुनौ

केदारनाथ उपचुनौ 20 नम्बर खुणि होलु। जै दिन बिटि केदारनाथम उपचुनौ क घोषणा ह्वे। वै दिन बिटि हि प्रदेसम राजनीति भिवड़ाट तेज ह्वेग्ये। सबि टिकटा लैनम लग्यां उमेदवार अपणा-अपणा दावा पेश करणा छायीं।

केदारनाथ सीट पर जै बातिन सबसे जादा लोगु कु ध्यान अपणि तरफां खैंचि, वा च यीं सीट बिटि विधायक शैलारानी रावता कुटुम्दरि क द्वी जणा (लोग) एक शैलारानी क नौनि अर एक शैलारानी कु धर्मनौनु जयदीप बर्त्वाल। द्वियौं न केदारनाथ सीटम अपिण दावेदारी कायी। ऐश्वर्या रावतन बोलि कि मि अपणि ब्वे कु बत्यां बाटौं म चलण चाणु छौ। वखि दूसरि तरफा अप्फु तैं शैलारानी कु धर्मपुत्र बतौंण वला जयदीप बर्त्वालन बोलि कि भाजपा उपचुनौ म कुटुम्दरि क सदस्य तैं टिकट दिंद, इल्लै मिन दावेदारी कायी। वखि जयदीपन शैलारानी क कुटुम्बदरि पर ठिकुरु फोड़ि अर बोलि कि मेरि ब्वे (शैलारानी) क ईलाजम लापरवै करे ग्यायी। साफ च टिकट पाणा खुणि अपणौं पर कीच उछलिकि राजनीतिक चाल चले ग्यायी।

ऐ मामला भाजपा अकबक च त दूसरि तरफा बदरीनाथ अर मंगलौर उपचुनौ जीतणा बाद कांग्रेस अगास म उड़णि च अर कांगेस तैं केदारनाथ सीटम बि अपणि जीत दिख्येंणि च।

लोकसभा चुनौम राजेन्द्र भण्डारी न अचाणचक कांग्रेस छोड़िकि भाजपा म सामिल ह्वेग्येन जै कारण या सीट खाली ह्वेग्ये। राजेन्द्र भण्डारिक बदरीनाथ सीट छ्वणा बाद यीं सीट पर उपचुनौ ह्वे। भाजपन राजेन्द्र भण्डारी तैं टिकट द्यायी। कांग्रेसा लखपत बुटोलन बदरीनाथ सीट जितिकि भाजपा तैं बौत बडु झटका द्यायी, त राजेन्द्र भण्डारिक राजनैतिक भवेष्य तैं त अबि अंध्यारु कै दे। त इन्नि मंगलौर सीट पर काजी निजामुद्दीन न भाजपा क करतार सिंह भड़ाना तैं हरै।

केदारनाथ उपचुनौ भाजपा अर कांग्रेस द्वियों खुणि प्रतिष्ठा बचौंणा कु चुनाव च। यीं कारण च कि द्विया दलु न अपणा पुरणा उमेदवारु तैं हि चुनौ क मैदानम उतारि।

भाजपा जणदि च कि अगर सरकार रैंद या सीट हत्थ से निकलि ग्यायी त, यां से बडु झटका हौरि क्य ह्वे सकदु। यीं कारण च भाजपन शैलारानी क नौंनी अर अप्फु तैं धर्मनौन बतौंण वला जयदीप बर्त्वाल तैं एक कुणा कैकि, केदारनाथ बिटि द्वि दा की विधायक आशा नौटियाल तैं टिकट द्यायी अर साफ बतै दे की वा बदरीनाथ अर मंलगौर सीट जन्ना झटका दुबरा कतै नी चाणि च।

भाजपा तैं अब आशा से आस च। आशा नौटियाल अबि भाजपा महिला मोर्चाक प्रदेश अध्यक्ष च। आशा नौटियाल 2002 अर 2007 म केदारनाथा विधायक छायीं। साल 2012 म हारिग्ये। त वखि 2017 म टिकट नीं मिलण से आशाा नौटियालन निर्दलीय चुनौ लैड़ि पर चुनौ हारि ग्ये।

वखि कांग्रेसन सीदा-साधा मनोज रावत तैं टिकट द्यायी, जु पैलि बि केदारनाथ सीट बिटि विधायक छायीं। मनोज रावतन साल 2022सम शैलारानी रावत तैं हरै छायीं।

उन्न त केदारनाथ सीट पर द्विया भाजपा अर कांग्रेस तैं जोड़-घटौ क अलाव क्वीं नफा नुकसान नीं च। पर बदरीनाथ अर मंगलौर उपचुनौ म मिलि हारा बाद केदारनाथ उपचुनौ भाजपा खुणि कुछ जादा हि प्रतिष्ठा कु सवाल बणिग्ये। भाजपा जणदि च कि केदारनाथ सीट हत्थ बिटि निकलि ग्यायी त, सरकरा काम-काज पर त सवाल खड़ा हि होला यांका दगड़े-दगड़ि इन्नु समझे जालु कि प्रदेस भाजपक हाम खतम ह्वेग्ये। इल्लै केदारनाथ विधानसभा भाजपा कु बडु इमत्यान च। यीं कारण च कि केदारनाथ उपचुनौम भाजपन अपणि सर्या ताकत लग्यीं च।

अब चुनौम कु जितदा अर कु हरदु, यु त अबि भवेष्य पुटगा म पर इतगा जरुर च कि केदारनाथ उपचुनौ म मुकाबला मजादार होलु।