पत्रकार समाज कु ऐना हूंद: मुख्यमंत्री धामी

देरादूण। मुख्यमंत्री धामीन आज उत्तराचंल प्रेस क्लब कु उर्यूं कार्यक्रम दीपावली महोत्सवम भाग ल्यायी अर सबि पत्रकारु अर प्रेस क्लबा सदस्यौं तैं बग्वाळै बधै द्यायी। उन्न बोलि कि बग्वाळ कु त्योवार हम सब्यौं क जिन्दगि तैं नै ताकत दिंणा कु माध्यम च। उन्न प्रदेसा रैवासी राजि-खुसी रैंया इन्न अरज कायी।

मुख्यमंत्री न बोलि पत्रकारिता तैं संविधान कु चौथु स्तंभ ब्वले जांद। पत्रकार अर पत्रकारिता सिरफ राजनीतिक अर सामाजिक विषयु कु प्रचार-प्रसारा जरिया हि ना बल लोकतंत्र तैं ज्यूंदू रखणा कु जरिया बि च। मुख्यमंत्रीन बोलि लोगु तैं सरकारा योजना तैं बतौंणा कु काम हूंया या ऊंकी दिक्कत तैं सरकार तैं बतौंणा कु काम हूंया, यांकी जिम्मेबरि पत्रकारू क कांधु पर हि हूंद।

मुख्यमंत्रीन बोलि कि पत्रकार समाज कु ऐना हूंद। जु सरकार अर सर्या सरकरि तंत्र तैं, वैका कामु से भ्वां मा हूंण वला असर तैं बतौंद। उन्न बोलि कि जब देस संकट कु सामना करद त हमरा पत्रकार, हमरा वीर ज्वानु जन्न सरकार अर जनता दगड़ि कंाधु से कांधु मिलैकि काम करदन।

मुख्यमंत्रीन बोलि कि सरकार बि पत्रकारु दिक्कत दूर करण खुणि सदनि तय्यार रैंद। उन्न बोलि हमन पत्रकारु पिंसन बढ़ै याली, वखि दुसर जनपद बिटि देरादूण औंण वला पत्रकारु तैं सूचना विभागा जरिया रैंणा कु बन्दबस्त करणा घोषणा कायी।
मुख्यमंत्री न पत्रकार पिंसन योजनाक जरिया पत्रकार कल्याण कोष म 2 करोड़ रुप्यौं क बढ़ौतरी कायी।

ऐ मौका पर विधायक मुन्ना सिंह चौहान, महानिदेशक सूचना बंशीधर तिवारी, उत्तरांचल प्रेस क्लब अध्यक्ष अजय राणा पत्रकार अर ऊंकी कुटुम्दरि बि छायीं।