मुख्यमंत्रीन किच्छम बणणु एम्स सैटेलाइट सेन्टर कु कायी निरीक्षण

देरादूण। मुख्यमंत्री धामीन आज खुरपिया फार्म किच्छम नै बणणू एम्स सैटेलाइट सेन्टर कु निरीक्षण कायी अर एम्स बारम जानकारी ल्यायी।

ऐ मौका पर काम करणि संस्था बतै कि एम्स किच्छा तैं राष्ट्रीय आपदा प्रबंधन अथॉरिटिक नियमानुसार 351 करोड़ रुप्यौं कु, 100 एकड़ जमीनम 280 बेड कु प्री फैब्रिकेटेड अस्पताल बण्यें जाणु च। जैमा आईसीयू , ओपीडी, नर्सिग हॉस्टल अर अस्पताला कर्मचारियों वास्ता रैंणा खुणि मकान बि बण्ये जाला। काम करणि वलि संस्थाक प्रबंधक न बतै कि काम बौत तेजी से चलणु च। उन्न बतै क एम्सा सड़कियौं क किनरौं पर डाळा लगौंणा अर पाणि निकलणा कु बन्दुबस्त बि करे ग्यायी। उन्न बोलि कि साल 2025 तक एम्स कु काम पूरू ह्वे जालु।

ऐ मौका पर मुख्यमंत्री न एम्स म काम करणा भुरत्यों (मजदूर) दगड़ि बात कायी अर ऊंकी दिक्कतु का बारम जाणकारी ल्यायी। मुख्यमंत्री न बोलि कि किच्छा म एम्स बणण से यखक बिमार लोगु तैं इलाज खुणि भैर नीं जाण प्वाड़लु। सबि सुविधा एक हि जगा अर एक हि अस्पतालम मिलि जाली।

मुख्यमंत्री न बोलि कि या हम खुणि बौत सौभाग्य बात च। ये मौका पर मुख्यमंत्रीन एम्स म एक डाळु बि लगै।

ऐ मौका पर सांसद अजय भट्ट, विधायक शिव अरोड़ा, तिलकराज बेहड़, निवर्तमान मेयर रामपाल सिंह, जिलाध्यक्ष भाजपा कमल जिदंल, गुंजन सुखीजा, प्रदेश मंत्री विकास शर्मा, महामंत्री अमित नारंग, मण्डलायुक्त दीपक रावत, जिलाधिकारी उदयराज सिंह, एसएसपी मणिकांत मिश्रा, सीडीओ मनीष कुमार छायीं।