देरादूणा झुराट. . .

चौछ्डि प्राकृतिक सुन्दरता अर शांत वातावरणा जै देरादूण पछ्याण छै। वु देरादूण आज अपणि पछ्याण बचौंणा खुणि कणाट करणु च। किलैक बल अब सांप्रदायकिता तनाव न देरादूणा देलिम अपण खुट्टा धैर दींन। देरादूणम रेल स्टेशनम अबि कुछ दिन पैलि घपरोल ह्वेग्ये, जैन देरादूणा रैवासियों तैं झक कै दे। किलैकि देरादूणन इन्नु पैलि कबि नी देखि छायीं। शांत रैंण वलु देरादूणम अचाणचक दंगौं जन हलात पैदा ह्वेग्यीन, जु देरादूण खुणि चिंता बात च। रेल स्टेशनम लांठा, डंडा अर ढुंगा लेकैकि लोग जमा ह्वेग्यीन।

बडु सवाल हि यौं च कि एक प्रेम प्रसंग का मुद्दा पर अचाणचक इतगा लोग कख बिटि जमा ह्वेग्येन। रेलवे पुलिसन एक नौनु जु एक 16 साला नौनि दगड़ि रेल स्टेशनम घुमणि छायीं, जै पर पुलिस तैं शक ह्वे, पुलिसन द्वियौं से पूछताछ कायी, पुलिस तैं जब क्वीं सै जवाब नीं मिलि त पुलिस द्वियौं तैं अपणा दप्तर में लेकैकि ऐग्ये। पुलिसनईऊंका कुटुम्दरि तैं रैबार द्यायीं। त या बात समणि की नौनि एक दिन पैलि घौर बिटि भागिकि अयीं च, जैकी बदायूं थाना म रिपोर्ट दर्ज च। इन्न मा जख नौना अर नौनि क ब्वे-बुबौं तैं पुसिल कु धन्यवाद करण चैंद छायीं, त वख ऐ मामला तैं धार्मिक बतै की खूब बवाल करे ग्यायी अर एक दुसर पर ढुंगा चल्यें ग्यीन। अबि कुछ दिन पैलि इन्न चमोली जिलम बि ह्वे। यीं बात उत्तराखण्ड तैं झक करणि च आखिर यीं कु लोग छन जु उत्तराखण्ड कु माहौल तैं खराब करणा कोसिस करणा छन।

बडु सवाल त यौं बि च राति 9 बजि अचाणचक इतगा लोग कनकैकि जमा ह्वेग्यीन? ऊंका हत्थु ढुंगा अर लांठा कनकैकि ऐग्यीन? यु सबि चाणचक त ह्वे नीं सकदु? आखिर इन्न घटना क पिछनै कु लोग छन, अर ऊंकु मकसद क्य च यांकु पता लग्यें जाण चैंद।

सवाल त यो बि च कि रेलवे स्टेशनम अचाणचक लोग लांठा, डण्डा अर ढुंगा लेकैकि पौंछिग्येन अर पुलिस तैं पता तक नीं चलि या उत्तराखण्ड खुणि चिंतै बात च। यु सब जांच कु मामला च अर पुलिस जांच म या बात त समणि ऐग्ये कि घटना से पैलि बौत सर्या लोग रेलवे स्टेशना पिछने जमा छायीं। इन्न मा कखि इन्न त नीं च कि देरादूणा माहौल खराब करणा त्यरि पैलि बिटि हूंणि छायीं। अब ये मामलम जु बि दोषी छन ऊंतैं कड़ी से कड़ी सजा दिये जाण चैंद। दोषी क्वीं बि हूयां, कैबि धर्म, जाति कु हूयां, वै पर सकत कारवै हूंण चैंद किलैकि कैथै बि धर्माक नौं पर देवभूमि अर देरादूणा पछ्याण तैं खराब करणा कु अधिकार कतै नीं च।