हिन्दी आणि नीं च अर बणिग्येन डाक सेवक

देरादूण। उत्तराखण्डम डाक विभागम अबि कुछ बगत पैलि हूयीं भर्तिम घपला कु मामला समणि एै। जैथैं लेकैकि प्रदेसा ज्वानु म भर्ति तैं लेकैकि नराजगी च।

बतै दियां की भारतीय डाक विभागन उत्तराखण्ड खुणि पोस्टमास्टर अर अस्स्टिेंट ब्रांच पोस्ट मास्टर क 1238 पदु पर भर्ति कै। मैरिट अधार पर ह्वे। इन्न मा भर्ति हूंया जादा लोग पंजाब, हरयाणा अर औरि प्रदेसु का छन। जांचम या बाद समिण ऐकि जौ कु भर्ति प्रक्रिया म चयन ह्वै, ऊतैं हिन्दी तक नीं आणि च अर डाक सेवका पद पर भर्ति ह्वेग्यीन। विभागा जांचम अबि तक या बात समणि आणि च कि छै अभ्यर्थी कु प्रमाण पतर पर शक च जौ पर मुकदमा दर्ज कर ग्यायी। डाक विभागन अब सबि अभ्यर्थियों क प्रमाण पतरू जांच का आदेश दे दीन।

भर्ति प्रक्रिया म बड़ी बात ज्वा समिण आणि च वा च कि जौ तैं हिन्दीं ल्यखण त दूर पढ़ण तक नीं आणि च ऊंकु चयन ह्वेग्ये। हरयाणा बोर्ड बिटि 10 पास एक अभ्यर्थी सबि विषयु मा ए ग्रेड च, अर वे अभ्यर्थी तैं हिन्दी ल्यखण तक नीं आणि च।

त वखि ऐ मामला उत्तराखण्ड डाक विभागन ब्वनु च कि अभ्यर्थी कु चयन वैका प्रमाण पतर देखिकि ह्वै। डाक सेवक पद पर मेरिट आधार पर त्यार करे जान्द। यी कारण च कि भैर लोगु मेरिट म जगा बणै अर उत्तराखण्ड लोग पिछने रै ग्यीन। घपरोल समणि औंणा बाद प्रदेसा नौन्यालु म नराजगी च सवाल खड़ा हूंणा छन कि जौ तैं हिन्दी तक नीं आणि च वु कु चयन कैन कैकि ह्वेग्ये।

पोस्ट ऑफिसम इन्न भर्ति कु यु पैलु मामला नीं च यां से पैलि बि साल 2023 म इन्न मामलु समणि ऐ छायीं। साल 2023 म भर्ति म 36 लोगु पर कारवै ह्वे अर 5 लोगु पर एफआईआर दर्ज करेग्ये छायीं।

इन्न मा अब 2024 म बि नकली कागजु क आधार पर नौकरि लगणा कु मामला समणि ऐ। उत्तराखण्ड रीजनल पोस्ट ऑफिस न प्रदेसा सबि डिवीजन से यांका बारम रिपोर्ट मांगि।