मुख्यमंत्री न शहीद राज्य आंदोलनकारियौं तैं द्यायी श्रद्धांजलि

देरादूण। मुख्यमंत्री धामीन आज शहीद स्थल रामपुर तिराहा पौंछिकि शहीद राज्य आंदोलनकारियों क याद म उर्यूं कार्यक्रम मा भाग ल्यायी अर शहीद स्मारकम फुळ अर्पित कैकि शहीदु तैं श्रद्धांजलि द्यायी।

ऐ मौका पर मुख्यमंत्री न रामपुर तिराहा गोलीकाण्ड शहीदु क प्रतिमा लगौंणक बि घोषणा कायी अर मुख्यमंत्री शहीद स्थल खुणि जगा देंण वला स्व. महावीर शर्मा क प्रतिमा कु बि शिलान्यास कायी।

ऐ मौका पर मुख्यमंत्री न बोलि कि शहीदु कु बलिदान अर मेनतन हमतैं उत्तराखण्ड राज्य मिलि। उन्न बोलि 2 अक्टूबर 1994 खुणि रामपुर तिराहा कु गोलीकाण्ड राज्य आंदोलन कु सबसे गैरु जखम दे ग्यायी। उन्न बोलि आंदोलनकारियों पर हूयां अत्याचारू तैं उत्तराखण्डा रैवासी कबि नीं भूलि सकदन। मुख्यमंत्रीन बोलि उत्तराखण्डा लोग सदनि यु वीरू का करजदार राला। उन्न बोल जै राज्य खुणि हमरा आंदोलनकारियों न अपणु सब कुछ दे द्यायी, वे प्रदेस तैं देस कु सबसे अच्छु प्रदेस बणौंणा खुणि हम दिन-रात काम करण छा।
मुख्यमंत्री न बोलि कि अलग प्रदेस बणणा बाद प्रदेसा डेमाग्राफी तैं बचौंण बि हमरि जिम्मेबरि च। अर सरकार देवभूमि उत्तराखण्डा डेमोग्राफी तैं बचौंणा खुणि काम करणि च अर या हम सब्यौंक बि जिम्मेबरि च।

उन्न बोलि कि प्रदेस सरकार प्रदेसम सकत भू-कानून ल्याणा त्यरि करणि च। जै खुणि विशेषज्ञ अर राज्य आंदोलकारियों दगडि बि बिचार करे जालु।

उन्न बोलि जब तक हम आन्दोलनकारियौं क सुपिनौं कु उत्तराखण्उ नीं बणै दिंदा तब तै हम चैन नीं रौला।

ऐ मौका पर राज्य मंत्री (स्वतंत्र प्रभार) कपिल देव , उपाध्यक्ष आपदा प्रबंधन समिति विनय रौहेला, विधायक प्रदीप बत्रा, जिला अध्यक्ष भाजपा ( मुजफ्फरनगर) सुधीर सैनी, श्रीमती मीनाक्षी स्वरूप, सचिव हरिचंद्र सेमवाल, जिलाधिकारी हरिद्वार अर औरि लोग छायीं।