सरकार से नराज बेरोजगार संघा का द्वी कार्यकर्ता पाणिक टंकी म चढ़िग्यीं

देरादूण। देरादूणम 9 दिन बिटि बेरोजगार संघा का प्रदेश उपाध्यक्ष अर कार्यकर्ता भूख हड़ताल पर बैठ्या छन। शासन-प्रशासन न ऊंकी क्वीं खबर नीं ल्यायी। यां से नराज बेरोजगार संघा का लोग परेड गिरौण्ड म बणि पाणिक टंकी म चढ़िग्येन।

द्वी कार्यकतौंक पाणिक टंकी म चढ़ण से पुलिस अर प्रशासनम हड़कंप मचिग्ये। खबर मिलणा बाद पुलिस बल वख पौंछिग्ये।

त वखि पाणिक टंकी म चढ़यां भूपेंन्द्र कोरंगा अर सुरेश कु ब्वनु च कि पिछल 9 दिन बिटि हमरा दगड़िया एकता विहार धरना स्थलम भूख हड़ताल पर बैठ्यां छन पर सरकार ऊंकी मांग नी सुणणि च। भूपेंद्र कोरंगा कु ब्वनु च कि बेरोजगार अपणि मांगु तैं लेकैकि भूख हड़ताल पर बैठ्यां छन पर सरकार ऊंकी मांग क्वीं कु समाधान नीं करणि च। यांका विरोधम हमन यु काम कायी।
उन्न बोलि सरकार हमरि मांग तैं नीं मानलि त आंदोलन हौरि तेज करे जालु। उन्न पुलिस कांस्टेबल अर वन आरक्षी भर्ति इमत्यानुम उमर बढ़ौंणा अर प्रतीक्षा सूची जारी करणा क दगड़ि बगत पर सबि इमत्यान करौंणा मांग कायी।