देरादूणम बणलि ऑटोमेटेड मैकेनिकल पार्किंग

देरादूण। देरादूणम अब बणलि ऑटोमेटेड मैकेनिकल पार्किंग। देरादूण प्रशासन न तय्यरि सुरु कै याली, अब जल्दी हि देरादूणम इन्नि पार्किंग कु बन्दुबस्त दिख्यलु। जिलाधिकारी न अधिकारियों तैं निर्देश दीं अर बोलि कि जौ जगों मा काम सुरू करे जै सकदु, वु जगों कु प्रस्ताव त्यार करे ज्यां। बैठक म अधिकारियोंन बतै कि सैरम कै जगा पार्किंग खुणि चिन्हित करे ग्यींन। जिलाधिकारी न विभागीय अधिकारियों बिटि सुझौ लेकैकि अर मिलिकि काम करणा निर्देश दींन।

बैठका बाद जिलाधिकारी सविन बंसल न बतै कि बैठक म मैकेनिक ऑटोमेटिक पार्किंग बणौंणा कु प्रस्ताव धरे ग्यायी। उन्न बोलि कि सैरम जन गाड़ियौंक भिभड़ाट बणणि च, वै खुणि मैकेनाइज्ड पार्किंग सै उपाय च। उन्न बोलि कि सैरम कुछ जगा द्यखि छन, जौंकु सर्वे बि ह्वेग्ये। यांका बाद एक प्रेजेंटेशन त्यार कैकि लोगुक सलाह लिये जाली। जैका बाद शासन की मंजूरि लेकैकि अगनै की कारवै सुरु करे जाली। उन्न बोल या पार्किंग कम पैंसों अर कम बगत म त्यार ह्वे जांद यांका दगड़ि आटोमेटेड मैकेनिकल पार्किंग तैं एक जगा बिटि दुसर जगा लिजये जै सकद।