सूर्यराग होला बदरीनाथा नै नायब रावल

बदरीनाथा नै नायब रावल सूर्यराग पी. न आज बीकेटीसी दप्तर मा पौंछिकि बीकेटीसीक अध्यक्ष अजेंद्र अजय दगड़ि मुखाभेंट कायी।

बदरीनाथ धाम क रावल ईश्वरा प्रसाद नंबूदरी क सेवानिवृत्ति लिंणा बाद बीकेटीसी न नायब रावल अमरनाथ के. वी नम्बूदरीक रावला पद तरक्ति कै छायीं।

यांका बाद नायब रावल पद पर भर्ति प्रक्रिया सुरु करे ग्यायी। शैक्षिक योग्यता अर हौरि जरुरी योग्यता अर साक्षात्कारा बाद सूर्यराग काबिलियत अधार पर बीकेटीसी न ऊंकु चयन नायब रावल पद खुणि कायी।

25 साला सूर्यराग छंचर खुणि बदरीनाथ धाम पौंछिकि रावल कु पद भार ग्रहण कारला।

बतै दियां की बदरीनाथ -केदारनाथ मंदिर एक्ट 1939 नुसार नायब रावला पद नामांकित करणा कु अधिकार टिरी महाराज तैं दिये ग्यायी।

बीकेटीसीन टिरी रियासत का पैल्यक महाराज मनुजयेंद्र शाहक मंजूरि लेकैकि भर्ति प्रक्रिया सुरु कायी। साक्षात्कार बोर्डम राज परिवार बिटि नामित एक सदस्य तैं शामिल करे जान्द। नायब रावला पद पर दक्षिण भारत केरल राज्य क नम्बूदरी ब्राह्मण हि नियुक्त हूंदन। अर नायब रावल हि प्रोन्नत ह्वेकि बदरीनाथा रावला पद पर नियुक्त हूंदन।