मुख्य सचिवन नमामि गंगे कार्यक्रमा परगति बारम बतै

देरादूण। नमामि गंगे कार्यक्रमा जरिया गदनों तैं हौरि साफ करणा कोसिस हौरि तेज ह्वेग्ये। या बात मुख्य सचिव राधा रतूड़ी न बोलि।

राधा रतूड़ी न बोलि कि 244.48 एमएलडी क्षमता का 62 सीवेज ट्रीटमेंट प्लाट बणौंण खुणि कुल 43 परियोजनौं तैं मंजूरि दिये ग्ये छायीं। जैमा अबि तक 36 परियोजना पूरि ह्वेग्यीन। यांका दगड़ि 20 एसटीपी प्लाट बणौंणा खुणि बची 7 परियोजनौं पर काम चलणु च।

मुख्य सचिवन बतै बल एनएमसीजी अर सीपीसीबी क जरिया करे ग्यायी मूल्यांकना नुसार 170 नालों की पछ्याण करे ग्यायी। जैमा 137 नालों तैं र्वके ग्यायी, अर बच्यां नालों पर काम चलणु च। उन्न बोलि कि केएफडब्ल्यू की वित्त पोषित परियोजना क जरिया हरद्वार अर ऋषिकेश म 541 किलोमीटर सीवर नेटवर्क म गंगा नदीम गिरण वला सीवेज तैं पूरि तरौं र्वकणा खुणि योजना प्रस्तावित च। उन्न बतै कि लगातार देखभाला कारण गंगोत्री बिटि ऋषिकेश तकाकु पाणि क गुणवत्ता म सुधार ह्वे। यु ‘वर्ग- ए’ मानक मतबल पाणि पीणा खुणि लैक च। ऋषिकेश बिटि हरद्वार तककु पाणि की गुणवत्ता ‘वर्ग-बी’, जु भैर नयेण खुणि च। उन्न बोलि या तैं हौरि साफ करणा कोसिस करे जाणि च।