लोगुक दिक्कत दूर करणु पैलु काम : जिलाधिकारी
देरादूण। नै जिलाधिकारी सविन बंसलन जिलाधिकारी देरादूणा कु पदभार सम्भालि याली। उन्न कोषागार डबल लॉक कु चार्ज लिंणा बाद कचहरी म संयुक्त कार्यालय अर प्रोटोकॉल कु निरीक्षण कायी अर सबि पटलु कु काम तैं देखि।
अपणु कार्यभार लिंणा बाद जिलाधिकारी न प्रेस वार्ता कायी अर बोलि कि जमीनु क ध्वका धड़ी मामलु तैं पैलि प्राथमिकता बतै अर प्रेस वलों का जवाब दींन।
जिलाधिकारी न बोलि जमीनु का ध्वका धड़ी का मामलौं तैं गंभीरता से लिए जालु अर जौन घपला करिन वु लोगों पर कारवै करे जाली।
जिलाधिकारी न बोलि कि ऊंकु पैलि काम लोगुक दिक्कतु का दूर करणु अर केन्द्र अर प्रदेस सरकारै योजनौं तैं प्रदेसा सबि लोगु तक बगतम पौंछाणा कु च। उन्न बोलि कि भ्रष्टाचार अर अपराध पर जीरो टॉलरेंसा नीति पर काम करे जालु। जनसंवाद माध्यमौं तैं हौरि कटकुटु बण्यें जालु, खास कैकि जनता दरबार तैं हौरि अच्छु बणौंणा कोसिस करे जाली।
जिलाधिकारी न कोषागार डबल लॉक कु चार्ज लिंणा बाद मुख्य कोषाधिकारी तैं निर्देश दीं कि जु दाना (बुजुर्ग) लोग पिंसन लिंणा छन वु तैं क्वी दिक्कत नीं हूंण चैंद या कु खास ध्यान रखे ज्यां।
संयुक्त कार्यालय कु बन्दबस्त दय्खणा बाद जिलाधिकारी न अधिकारी अर कर्मचारियौं तैं निर्देश दीं बल लोगुक दगड़ि अच्छु बरतौव करे ज्यां अर आण वलि लोगु क दिक्कत तैं सूणिकि ऊंकी दिक्कतु तैं दूर करणा खुणि काम कर्यां।