हरक सिंह रावतक दिक्कत कम नी हूंणि छन, अब ईडीन बुलै

देरादूण। हरक सिंह रावतक दिक्कत कम नी हूंणि छन। सीबीआई क बाद अब ईडी न ऊतैं बलै। ईडी न सोमाबार खुणि हरक सिंह रावत तैं ईडी क दप्तर ऐकी अपणि बात बतौंणा खुणि बोलि।

बतै दियां की पैलि सीबीआई न हरक सिंह से पूछताछ कायी।

पाखरों रेंज घपला क मामला म साल 2022 म विजिलेंस न मुकदमा दर्ज कै छायी। ऐ मुकादमा म पैल्यक डीएफओ किशन चंदा दगडि कै अधिकारी तैं पुलिसन पकड़ि छायीं। जैका बाद विजिलेंस न पिछल साल अगस्त म हरक सिंह रावत अर ऊंका संस्थानु पर छापा मारि छायीं। हाईकोर्टा आदेश पर सीबीआई तैं जांच दिये ग्यायी। विजिलेंस न ऐ केस के सबि जांच पतर सीबीआई तैं दे दींन। तबि ईडी न मामला बारम जाणकारी ल्यायी। जैका बाद फरवरी 2024 म ईडी न हरक सिंह रावता अर ऐ मामला से जुड्यां अधिकारियों क घौरम छापा मारि। हरक सिंह रावता घार म कुछ नीं मिलि।

अब हरक सिंह रावत तैं ईडी दुबरा पूछताछ खुणि बुलै। जै फर एकदा दुबरा प्रदेसा राजनीति सुरु ह्वेग्ये।
कांग्रेस ब्वनी च कि भाजपा छ्वड़णा बाद बिटि हरक सिंह रावत पर दबाव बणै जाणु च अर हरक सिंह रावत तैं डरौंणा कोसिस हूंणि च।

पाखरों टाइगर सफारी मामला म ईडी न पैलि हरक सिंह रावत ऊंकी घरवळि क दगड़ि ऊंका नौना-ब्वारी तैं बि समन भेजि छायीं।

ईडी न अबि कुछ दिन पैलि हरक सिंह रावत अर आईएफएस अफसर सुशांत पटनायक क यख छापा मारि छायीं।