चारधाम अर पर्यटक की जगोंम अब नी होलु प्लास्टिक अर खैड़

देरादूण । उत्तराखण्ड म हरेक साल करोडु लोगु घुमण खुणि औंदन। यां से प्रदेसा आर्थिक पर बौत बडु असर हूंद। दूसरि तरफि चारधाम अर अर हौरि पर्यटकौं क जगों म खुब कींच (गंदगी) अर प्लास्टिक पसरै (फैल) जांद। जैका बारम प्रदूषण नियंत्रण बोर्ड, प्लास्टिक वेस्ट मैनेजमंेट क जरिया डिजिटल डिपॉजिट रिफंड सिस्टम सुरू हूंणि च। जै की सुरूआत मुख्यमंत्री धामीन सचिवालय बिटि कायी। ऐ मौका फर मुख्यमंत्रीन पैलि प्लास्टिका बोतळ तैं बार कोड से स्कैन कायी अर डिजिटल पेमेंट कायी।

मुख्यमंत्री धामीन बोलि कि द्वी साल पैलि डिजिटल डिपॉजिट रिफंउ सिस्टम तैं पायलैट प्रोजेक्ट क रुपम रुद्रप्रयाग जिला बिटि सुरू करेग्ये छायीं अर रुद्रप्रयाग जिला तैं डिजिटल इंडिया अवॉर्ड-2022 म सम्मानित करेग्ये छायीं। पर्यावरण संरक्षण, प्लास्टिका इसतमाल तैं कम करणा दगड़ि प्लास्टिक तैं रिसाइकल कैकि इसतमाल करणा खुणि डिजिटल डिपॉजिट रिफंड बौत जादा अच्छु साबित होलु।

मुख्यमंत्री न बोलि कि यीं पहल से चारधाम समेत हौरि पर्यटना जगों म कूड़ा कम होलु अर पर्यावरण तैं साफ रखणा म बि मदत मिललि।

मुख्यमंत्री न बोलि आजै बगतम प्लास्टिक सर्या दुन्या खुणि बड़ी दिक्कत पैदा करणि च। उन्न बोलि धार्मिक अर पर्यटना जगों बिटि निकलण वलु प्लास्टिका कु खैड़ बौत बड़ी समस्या च। जै खुणि सरकार काम करणि च। उन्न बोलि बल प्रदेसा भितर स्वच्छता कु वातावरण हूंया अर उत्तराखण्ड साफ अर हैरु-भैरु हूंया या फर सरकार काम करणि च। उन्न बोल प्रदेसा प्राकृतिक संपदा तैं बचै कि रखणु हम सब्यौं क जिम्मेबरि च।

मुख्यमंत्री न बोलि कि गदना, बोण अर पाड़ प्रदेसा बड़ी धरोहर अर पछ्याण छन पर प्लास्टिक कु खैड़ यु तैं नुकसान पौंछाणु च। यु तैं बचौंणा वास्ता सरकार विज्ञान अर नै जमना तकनीक कु इसतमाल करणि च।