नौनु से आवेदन वापिस लिंणा विनति करलु : महाराज

पर्यटन विकास प्राधिकरा क जरिया टिरी झील म क्रूज चलौंणा खुणि आवेदन मंगे ग्यींन। जैमा 25 लोगुन आवदेन कायी, जांचा बाद छै लोगु का आवेदन पर सहमति बणि। जैमा म्यारु नौनु सुयश रावत भी सामिल च। सर्या प्रक्रिया साफ च, यांका बाद बि सुद्दि विवाद बणै जाणु च। लोगु तैं म्यरा नौना कु आवेदन करण से दिक्कत च, त मि वैथैं ब्वललु कि अपणु नौं वापिस ले ले। या बात लोक निर्माण विभाग मंत्री सतपाल महाराजन न प्रेस तैं बोली। उन्न बोलि कि टिरी झील म पर्यटन विकास प्राधिकरण क जरिया क्रूज बोट चलौंणा खुणि आवेदन मांगिन।
जैमा 25 लोगुन आवदेन कायी, जैमा छै लोगु का आवेदन पर सहमति बणि। जैमा म्यरू नौना कु नौं बि च।

महाराजन बोलि कि जु लोग ऐ मामला मा विवाद करणा छन ऊतैं पता हूंण चैंद कि यीं सिरफ आवदेन छन। अबि बोट चलौंणा कु मंजूरि कैथैं बि नी मिलि।

महाराजन बोलि बल कुछ राजनैतिक मनखि टेन्डर बतै की झूठ फैलौंणा छन, सच यौं च कि सरकारै तरफि बिटि यीं योजना म क्वीं पैसा नी लगै ग्यायी अर न लगै जाणु च, सबि पैसा बोट चलौंण वला तैं लगौंण प्वाड़लु।

महाराजन बोलि कि ऊंकु नौंनु चाणु छायीं कि वु बि उत्तराखण्ड म काम करे ज्या अर कुछ लोगु तैं रूजगार दिये ज्यां पर लोगुन यां मा विवाद पैदा कै द्यायी। महाराजन बोलि मेरी राजनैतिक जिन्दगि म साफ च, मि फर क्वीं दाग-धब्बा नीं च। उन्न बोलि राजनीति म स्वच्छता अर सुचिता हूंण चैंणि च।

महाराजन बोलि कि चौर्तफा हूणि छवीं बत्थौं तैं देखिकि अब मि अपणा नौंनु से विनति करलु कि वु ये आवेदन बिटि अपणु नौं वापिस ले ले, जै से क्वीं विवाद ही न हूयां।