मुख्यमंत्री धामीन कायी आपदा तोक कु दौरा
मुख्यमंत्री धामीन आज टिरी आपदा तोक म जखन्याली जैकि आपदा प्रभावित तोक म लोगु से मुलाकात कायी अर ऊंकी हिकमत बढ़ै। मुख्यमंत्री न म्वरयां लोगुक आत्मका शान्ति अर दुखी कुटुम्दरि तैं हिकमत देंणा भगवान से अरज कायी।
मुख्यमंत्री न बोलि कि आपदा क बगत शासन अर प्रशासन क पीड़ितौं क दगड़ि खडु च। सरकारै तरफि बटि सबि तरौंक मदत करै जाली। मुख्यमंत्री न बोलि कि सबि लोग ये बगत एक दुसरा क मदत कर्यां। मुख्यमंत्री न बोलि कि आपदा न जनहानि अर पशु हानि अर खेति-पाति कु बौत नुकसान ह्वे।
मुख्यमंत्री न बोलि कि ऐ बगत म लोगु क सुरक्षा सरकार कु पैलि काम च। उन्न जिलाधिकारी तैं आपदा पीड़ितों तैं झट राहत देंणा खुणि अर सबि बन्दुबस्त पूरा करणा का निर्देश दींन।
मुख्यमंत्री न जिलाधिकारी तैं आपदा से हूयां नुकसान कु पता कैकि झट कैकि सुरक्षा बन्दुबस्त करणा निर्देश दींन। उन्न आपदा क तोकम जरुरत कु समान सड़क, बिजली, पाणि कु बन्दुबस्त करणा खुणि बि बोलि।
मुख्यमंत्री तैं जिलाधिकारी टिरी न या जाणकारी द्यायी कि ब्याली राति घनसाली क जखन्याली क बादल फटणा बाद एक होटला ब्वागणा की खबर मिलि। जन्नि खबर मिलि राजस्व टीम, पुलिस, एसडीआरएफ, स्वास्थ्य, सड़क बिजली विभागा क टोलि अर रोगी वाहन मौका पर पौंछिग्ये।
ऐ मौका पर कैबिनेट मंत्री सतपाल महाराज, विधायक घनसाली शक्ति लाल शाह, विधायक टिहरी किशोर उपाध्याय, एसएसपी नवनीत सिंह भुल्लर बि छायीं।