मुख्यमंत्री न टिरी बाल गंगा अर बूढ़ा केदार म अयीं आपदा पर जतै दुख
देरादूण। मुख्यमंत्री धामीन टिरी म भिलंगना विकासखण्ड क बाल गंगा अर बूढ़ा केदार म बरख न हूंया नुकसान पर गढ़वाल आयुक्त अर जिलाधिकारी तैं राहत अर बचाव क काम करणा खुणि बोलि।
मुख्यमंत्री न घटना पर दुख जतै अर प्रभारी मंत्री प्रेमचन्द्र अग्रवाल थैं वख जैकि राहत अर बचाव क कामु क समीक्षा करणा खुणि बोलि।
मुख्यमंत्री न जिला प्रशासन तैं जौ गौं म आपदा ऐ, वु गौं तैं दुसर जगा बसौंणा खुणि बि बोलि। मुख्यमंत्री न यु बि बोलि कि वख रैवासियों अर ऊंका गौर तैं बि वीं जगा लिजाणा कु बन्दुबस्त करै ज्या जख खतरा नी हूंया।
मुख्यमंत्री न जिलाधिकारी तैं बोलि कि बचाव कैंप म बिजली, पाणि कु बन्दुबस्त पर झट बचाव राशि दिये ज्या।
वखि जिलाधिकारी न बतै कि बालगंगा तोक म राति बौत बरखा ह्वे जख तोली गौं म एक मकान माटम दबिग्ये अर द्वी ब्यटुलों क दब्यूं हूंणा क खबर च।
एसडीआरएफ, पुलिस, राजस्व अर स्वास्थ्य विभागा टोलि तैं मौका पर वख फटये ग्यायी अर बचाव क काम सुरु करै ग्यीन।