मुख्यमंत्रीन कायी एससीईआरटी कु भवन कु लोकार्पण

देरादूण। मुख्यमंत्री धामीन आज ननूरखेड़ा देरादूण म उर्यूं कार्यक्रम मा शैक्षिक अनुसंधान एवं प्रशिक्षण परिषद् उत्तराखण्डा कु नै बण्यूं भवन कु लोकार्पण कायी। ऐ मौका पर मुख्यमंत्री न प्रदेसा सरकरि इस्कुलौं म सीएसआर क मददतन बण्यां 442 स्मार्ट क्लास तैं बि सुरु कायी।

ऐ मौका पर मुख्यमंत्री 2023 अर 2024 म दस अर बारम इमत्यान म जादा नम्बर ल्याण वला तीन-तीन स्कुलौंक् पैलु 10 म आण वला बच्चौं तैं ईमान बि द्यायी।

मुख्यमंत्री न शिक्षा विभाग तैं द्वि साल भितर एससीईआरटी कु नै भवन बणणा खुणि बगत दियंु छायीं। 29 करोड़ 25 लाख रुप्यौं खरच कैकि बगत से पैलि यु भवन त्यार करै ग्यायी।

मुख्यमंत्री न बोलि कि एससीईआरटी भवन बणण से शैक्षिक विकास, शिक्षक प्रशिक्षण, शैक्षिक अनुसंधान अर प्रदेसा शिक्षा बन्दबस्त तैं हौरि कटकुटु बणौंणा म मदत मिललि। उन्न बोल कि सीएसआर क जरिया बणि 442 स्मार्ट क्लासा सुरु हूंण से सरकरि स्कुलु म पढ़ै कु बन्दुबस्त हौरि अच्छी होलि।
मुख्यमंत्री न बोलि कि शिक्षा तैं अगनै बढ़ौंणा क काम करण वलों तैं सम्मानित करणु मेरु सौभाग्य च। उन्न बोलि कि बच्चौं क अपणि मेनत, लगन बल पर यु परिणाम हासिल कायी। यीं ईनाम बच्चों अर मास्टरु तैं इन्नि काम अगनै करणा खुणि प्रेरित कारलु अर हौरि लोगु खुणि बि प्रेरणा द्याला।

ऐ मौका पर शिक्षा मंत्री डॉ. धन सिंह रावत, विधायक उमेश शर्मा काऊ, महानिदेशक बंशीधर तिवारी, निदेशक एससीईआरटी श्रीमती वन्दना गर्ब्याल, निदेशक माध्यमिक शिक्षा महावीर सिंह बिष्ट, निदेशक प्राथमिक शिक्षा रामकृष्ण उनियाल अर शिक्षा विभागा अधिकारी छायीं।