एक मैना म सड़कियौं क खडवळा भ्वरे ज्यां : धामी
देरादूण। मुख्यमंत्री धामीन आज मुख्यमंत्री आवास म समीक्षा बैठक कायी अर अधिकारियों तैं निर्देश दीं कि एक मैना म प्रदेसा सबि सड़कियौं क खडवळा भ्वरे ज्यां। उन्न बालि कि बस्गाल क मैना म सबि काम झटाझट करे ज्यां अर गुणवत्ता कु खास ख्याल रखे ज्यां।
मुख्यमंत्री न बोलि कि कांवड़ म्यळा सुरू हूंणू च जैथैं देखिकि म्यळा म सुरक्षा अर साफ सफै, पाणि, स्वास्थ्य जनि सबि सुविधा अर घाटु म साफ सफै कु बन्दुबस्त करे ज्यां।
मुख्यमंत्री न निर्देश दींन कि पाडु़ क भार सैणा क्षमता तैं देखिकि निर्माण कु काम करै ज्यां। मुख्यमंत्री न बोलि की जौ सरकरि गेस्ट हाऊस क स्थिति ठीक नी च, ऊतैं ठीक करणा कु काम करै ज्यां अर गेस्ट हाऊसौंक सुविधा तैं हौरि अच्छु करे ज्यां।
मुख्यमंत्री न अधिकारियों तैं निर्देश दींन कि जीएसटी कलेक्शन बढ़ौंणा पर खास ध्यान दियें ज्यां अर प्रदेसम कै बि तरौं क जीएसटी चोरी नी हूंण चैंद।मुख्यमंत्री न डिजिटल पेमेंट तैं बढ़ावा देंणा क बि निर्देश दींन।
बैठकम मुख्य सचिव श्रीमती राधा रतूड़ी, प्रमुख सचिव आर. के सुधांशु, सचिव शैलेश बगोली, विनय शंकर पाण्डेय, एडीजीपी ए.पी अंशुमन अर आईजी कृष्ण कुमार वी.के बि छायीं।