बदरीनाथ उपचुनौ : दलबदलू नेतौं थैं जनता बरदास करणा खूणि त्यार नी च

बदरीनाथ अर मंगलौर विधानसभा उपचुनौ कु नतीजा ऐग्येन। नतीजौं न या बात साबित ह्वेग्ये कि अब ह्वा म राजनीति करण वलों थैं जनता कतै बरदास करणा खूणि त्यार नीं च। बदरीनाथा जनतन साफ कै दे की बिना स्वच्यां कैबि उमेदवार तैं हमर मुण्ड म थ्वपणा कु जमनु चलिग्ये अर मंगलौर न बतै कि चुनाैं म थ्वड़ा बि मेनत करै ज्यां त मुकाबला करै जै सकदु।

बदरीनाथ म भाजपा जनतक ज्यूं म क्य बात च, यीं बात थैं समझि नी साकी। अर लोकसभा चुनौ म भितरा-भितर ज्वा हूंणू छायीं वै तैं समझि नी साकी अर विधानसभा उपचुनौ म गलत उमेदवार तैं टिकट दे की हारि ग्ये अर मंगलौर चुनौ म हरणा बात बि भाजपान कांग्रेस अर बसपा क कंदूण खड़ा कै दींन।

बदरीनाथ कु नतीजा ऊं लोगु थैं जनता कु जवाब च, जु लोग लोकसभा चुनौ से पैलि राजेन्द्र भण्डारीक भाजपा म सामिल हूंण से ब्वना छायीं कि लोकसभा अर विधानसभा द्विया सीट अब भाजपा की छन। कुछ हौरि लोगुकु भाजपा म आण से लोकसभा चुनौं म गढ़वाल सीट बिटि भाजपा थैं द्वि लाख बोटु कु नुकसान ह्वे।

बदरीनाथ जनतन जै राजेन्द्र भण्डारी थैं विधानसभा म भेजि, वीं विधायक लोकसभा चुनौं म बदरीनाथ रैवासियौं तैं अचाणचक बीच बाटा म छोड़िकि फुर ह्वेग्ये अर उपचुनौ कु भारू ऊंकु कांधौं मा धैरिग्ये। भंडारी क ऐ फैसलन बदरीनाथ जनता नराज छायीं। भण्डारी त अपड़ा फैदा खूणि भाजपा म चलिग्येन पर ऊंका च्यालौं न भाजपा म आणौं से मना कै दे।

भण्डारी क खिलाप या नराजगी भाजपा लोकसभा चुनौ म समझिग्ये अर भण्डारी तैं लोकसभा चुनौ म जादा प्रचार नी करण दे। भण्डारी लोकसभा चुनौ म भाजपा तैं अपणि तोक बिटि जीत नी दिलै साका। हां इतगा जरूर ह्वेकि लोकसभा चुनौ से भण्डारी तैं दूर रखण कु भाजपा थैं फैदा ह्वे। लोकसभा चुनौ म भाजपा बदरीनाथ सीट पर 8 हजार बोट से अगनै रायीं।

भण्डारी क खिलाप जनता न भारी नराजगी छायीं। यांका बाद बि भाजपा न उपचुनौ म राजेन्द्र भण्डारी तैं टिकट दिंणा क गलति कै दे। भाजपा कु कैडर बोटरु भण्डारी अर भण्डारी भाजपा क बीचम तालमेल नी बैठे साका। भाजपा क लोग राजेन्द्र भण्डारी प्रचारम ज्यूं से काम नी करणा छायी, किलैकि जै राजेन्द्र भण्डारी क घरवलि क खिलाप पिछल पांच सालु बिटि भ्रष्टाचार आरोप लगै कि गौं-गौं घुमणा छायीं, आज वे भण्डारी कु कै मुखन गुणणान करदा।

राजनीतिक जणगुरु बि भण्डारी क भाजपा म जाण से झक हूयां छायीं, सब्यौं कु ब्वनु छायीं कि गढ़वाल भाजपा कु गढ़ च। इन्न म यीं सीट तैं लेकैकि इतगा चबलाट किलै। बीच लोकसभा चुनौ म भण्डारी कु भाजपा म आणा से भाजपा थैं फैदा कम अर नुकसान जादा ह्वे अर अब उपचुनौ म बदरीनाथ सीटम हार से भाजपा झक च।

हां या से या बात साफ ह्वेकि लोगु भाजपा ने नराज नीं छायीं। अर नराज हूंदा त द्वी मैना पैलि हूयां लोकसभा चुनौ 2024 म भाजपा उत्तराखण्डा पंच्या सीट नी जितदि।

मंगलौर म भाजपन कांग्रेस तैं कड़ी टक्क्र द्यायी अर इतिहास बणै। जै मंगलौर म भाजपा तिसर नम्बर पर रैंदि छायीं, वख वा सिरफ 400 बोटु से हारि। भाजपा तैं पिछल बार 2022 क मुकाबला 2024 क उपचुनौ म द्वीगुणा जादा बोट मिलिन।

यां से साफ च कि पार्टी संगठन अर पार्टी से लोग नराजन नी छन। हां नराज छन त गलत उमेदवार तैं चुनौ म टिकट दिंण से।