मेरू सम्मान उत्तराखण्डा देवतुल्य जनता कु सम्मान च : मुख्यमंत्री धामी
देरादूण। म्येरू पहाड़ फाउण्डेशन न उत्तराखण्ड विधान सभा म समान समान नागरिक संहिता विधेयक पास हूंण पर सम्मान समारोह उर्यायी ये कार्यक्रम म बुद्धिजीवी, जनप्रतिनिधि अर फाउण्डेशन से जुड़्यां लोगुन भाग ल्यायी।
म्येरू पहाड़ फाउण्डेशन न उत्तराखण्ड म समान नागरिक संहिता लागू करणा वास्ता धामी न सबि खूब तारिफ कायी अर प्रदेसम नागरिक संहिता विधेयक पास हूंणक पिछने उत्तराखण्ड जनता कु आशीर्वाद बतै।
मुख्यमंत्री न संविधान बणौंण वला बाबा साहिब डॉ. भीमराव अम्बेडकर अर पं. दीन दयाल उपाध्याय तैं नमन कायी अर बोलि कि देस म सबि लोगु खूणि समान कानून लागू हमरू संकल्प छायीं। उन्न बोलि कि उत्तराखण्ड सरकार न समान नागरिक संहिता पर देवभूमि क सवा करोड़ रैवासियों दगड़ि करीं अपड़ि सौं पूरि कायी। उन्न बोलि 2022 विधानसभा चुनौ से पैलि प्रदेस क जनता से प्रधानमंत्री मोदी क ‘एक भारत अर श्रेष्ठ भारत’ मंत्र तैं पूरू करणा खूणि समान नागरिक संहिता ल्याणा कु भरोसु दे छायीं। प्रदेसा जनता न हमतैं समान नागरिक संहिता कानून ल्याणा खूणि दुबरा आशीर्वाद द्यायी। सरकार बणाणा बाद झट हमन प्रदेसा रैवासियों हुकुम तैं मुंड मा धैरि अर पैलि कैबिनेटा बैठक मा समान नागरिक संहिता कानून खूंणि एक समिति बणाणु कु फैसला ल्यायी।
मुख्यमंत्री न बोलि कि 343 जनसंवाद कार्यक्रम उर्यें बाद समति तैं 2.33 लाख सुझौव मिलिन। समिति न मिल्या सुझौव पर खूब विचार कायी अर द्वी फरवरी 2024 अपणि रिपोर्ट सरकार तैं द्यायी अर 7 फरवरी खूणि विधानसभा म पास कै अर राष्ट्रपति तैं मंजूरि खूणि भेजि अर 11 मार्च खूणि राष्ट्रपति न मंजूर कै द्यायी।
अब नियमावली बणौंणा खूणि समिति बण्यें ग्यायी। उन्न बोलि जन्नि समिति अपणि रिपोर्ट देलि उन्नि ऐसु साल अक्टूबर म यु कानूनन प्रदेस म लागू करै जालु।
मुख्यमंत्री न बोलि कि जन्नि यी देवभूमि बिटि निकलण वलि मां गंगा अपणा छाल रैंण वली सबि जीवु तैं बिना कै बि भेदभाव कु पलदी उन्नि प्रदेसा विधानसभा म पास समान नागरिक संहिता या गंगा हमरा सबि प्रदेसा रैवासियों क संवैधानिक अधिकारु तैं तय काराली। मुख्यमंत्री धामी न बोलि कि सबि नागरिकों खूणि एक जन्नि कानूना बात त हमरु संविधान बि करदू।
मुख्यमंत्री न बोलि कि आज उत्तराखण्ड म विकास अर विश्वास क मंतग च। आज उत्तराखण्ड लोगुक सुपिनौं तैं पूरू कैकि अगनै बढ़णु च। मुख्यमंत्री न बोलि कि मेरू सम्मान उत्तराखण्डा देवतुल्य जनता कु सम्मान च।
म्येरु पहाड़ फाउण्डेशन क अध्यक्ष प्रो. दयाल सिंह पंवार, एडवोकेट सतीश टम्टा, पैल्यक आईएएस कुलानंद जोशी, देवेन्द्र जोशी न अपणि बात बोलि। ऐ मौका पर आपदा प्रबंधन सलाहकार परिषदा उपाध्यक्ष विनय रोहिला, प्रो ललिता गांधी, डॉ धर्मा रावत बि छायीं।