जिलाधिकारी न कायी नगर निगम देरादूण मा धप्प निरीक्षण

जिलाधिकारी देरादूणन आज नगर निगम देरादूण मा धप्प निरीक्षण कायी। ऐ मौका पर जिलाधिकारी न नगर निगमा सबि पटलौं मा जैकि ऊंकु काम देखि। जिलाधिकारी कर्मचारियों क हाजिरी जांच कायी। निरीक्षणा मा 51 कर्मचारी अपणा पटलम नीं मिला, जै बारम जिलाधिकारी न नगर आयुक्त तैं सबि कर्मचारियों क गैरहाजिरी लगौंणा आदेश दींन।

जिलाधिकारी न नगर निगम मा अयां लोगु से मुखाभेंट कायी अर लोगु से नगर निगम आणा कु कारण पूछी की, ऊंकी समस्या कु हल करणा खूणि अधिकारियों तैं निर्देश दींन।

जन्म, मृत्यु पतर मा हूणि देरी क बरमा कर्मचारियों न बतै कि या दिक्कत वेबसाईट क कारण हूणि च, जै बारम जिलाधिकारी वेबसाइट म सुधार करण का आदेश दींन।

जिलाधिकारी न नगर निगमम चलणा काम अर नै हूणा वला कामु क बारम जाणकारी ल्यायी। उन्न सोर्स सग्रीगेशन खूणि कामु क सूची अर एमओयू करार (अनुबन्ध) क फैल बि मंगै।

निरीक्षण बाद जिलाधिकारी न नगर निगमा अधिकारियों दगड़ि बैठक कायी अर नगर निगमा जमीन क बारम जाणकारी ल्यायी। जिलाधिकरीन नगर निगम जमीन पर तारबाड़ करणा क खूणि बोलि। जिलाधिकारी न नगर निगम खाली प्वड़ि जमीन पर डाळा लगौंणा अर पार्क बणौंणा निर्देश बि दींन।

जिलाधिकारी न बोलि कि सबि खिड़की पर जु बि काम हूणु च वांका बारम जाणकारी दियें ज्यां। उन्न बोलि कि सबि जाणकारी अर कामु क बारम वेबसाइट पर बत्यें ज्यां, जै से लोगु तैं अपणा कामु क बरगत क बारम ऑनलैन जाणकारी मिलि सक्यां।

जिलाधिकारी न निगमम छ्वटा अर बड़ी गाड़ी, अलग-अलग जगा खड़ी करणा निर्देश दींन।